Qazaqstanda koronavirýsqa qarsy ekpe egý naýqany qashan bastalady? Bul suraqqa Densaýlyq saqtaý ministrliginiń resmi ókili Baǵdat Qojahmetov jaýap berdi, dep habarlaidy QazAqparat.
«Qazirgi tańda álemdik vaktsinalardyń ishinde jyldamdyǵy boiynsha ozyq shyqqany – Resei jáne Oksford ekpesi. Ókinishke qarai, Oksford vaktsinasyn synaý barysynda adam aǵzasyna keri áser etetin bir belgi anyqtaldy. Osynyń saldarynan ony zertteý jumystary toqtap qaldy. Reseilik vaktsina klinikalyq synaqtyń úshinshi satysynan ótýde. Oǵan 10 myńdaǵan adam qatysyp jatyr. Bul – ekpe protsesi emes, klinikalyq zertteý satysy. Osyny shatastyrmaý kerek», - dedi Baǵdat Qojahmetov OKQ-da ótken baspasóz máslihatynda.
Onyń aitýynsha, qazaqstandyq vaktsina da óte jaqsy nátije kórsetip otyr.
«Densaýlyq saqtaý ministrliginiń sarapshylarynan quralǵan top Jambyl oblysyndaǵy zerthanany kórip qaitty. Ázirge qazaqstandyq vaktsina klinikalyq synaqtyń alǵashqy fazasynan ótip jatyr. Aldaǵy ailarda atqaratyn qaýyrt jumys kóp. Bul baǵyttaǵy isti jalǵastyramyz», - dedi ol.
