COVID-19 indetinen emdeý úshin dárilik zattardyń 48 paiyzyn otandyq óndirýshiler óndirip jatyr. Bul týraly QR DSM Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary Nurlybek Asylbekov málim etti, dep habarlaidy QazAqparat.
«Densaýlyq saqtaý ministrligi tarapynan farmatsevtikalyq óndiristi damytý men qoldaý jáne importqa táýeldilikti tómendetý maqsatynda 10 jylǵa deiingi merzimde dárilik zattardy jetkizýge uzaqmerzimdi sharttardy bekitý arqyly otandyq taýar óndirýshilerdi qoldaý sharalary iske asyrylýda. Buǵan deiin osy merzim jeti jylǵa deiin bolǵan edi», - dep toqtaldy N. Asylbekov Ortalyq kommýnikatsiialar qyzmetinde.
Onyń sózine qaraǵanda, 3600 dári-dármek pen meditsinalyq ataýly zattardy jetkizýge 32 otandyq taýar óndirýshimen bekitilgen 63 uzaqmerzimdi shart bar. Jyl saiyn Biryńǵai distribiýter satyp alýlarynda otandyq taýar óndirýshiler úlesi artyp keledi. Bul óz kezeginde jalpy kólemde aqshalai mánde 30 paiyzdy qurap otyr. Al 2024 jylǵa qarai onyń deńgeiin 80 paiyzǵa deiin arttyrý josparlanyp otyr.
«Qazirgi kezde Biryńǵai distribiýter satyp alýlarynda otandyq óndirýshilerdiń qaptamadaǵy ónimi 70 paiyzdan artyq bolyp tur. Atap aitqanda, COVID-19 indetinen emdeý úshin dárilik zattardyń 48 paiyzyn otandyq óndirýshiler óndirip jatyr», - dedi N. Asylbekov.
