S.Asfendiiarov atyndaǵy QazUMÝ immýnologiia kafedrasynyń meńgerýshisi Elmira Bitanova onlain brifing barysynda koronavirýsqa qarsy vaktsinatsiia týraly aitty, dep habarlaidy QazAqparat.
Mamannyń aitýynsha, infektsiiamen kúrestiń basty tásili - vaktsinatsiia bolyp otyr.
«Koronavirýs únemi bolǵan. Ǵalymdar bul virýstyń birneshe túrin biledi. Biraq virýspen kóbine janýarlar - it-mysyqtar, qustar aýyratyn. Qazir adamdarǵa juǵatyn koronavirýstyń birneshe túri belgili. Onyń biri - ótkir respiratorlyq SARS infektsiiasy men taiaý shyǵystyq MERS infektsiiasy. Pandemiia bastalǵanda MERS pen SARS vaktsina negizi bolǵan. Qazir barlyq ǵylymi ortalyqtar sol negizge arqa súiei otyryp, koronavirýs vaktsinasyn oilastyryp jatyr», - dedi ol.
Qazir álemde koronavirýsqa qarsy barlyq jahandyq ǵylymi ortalyqtar kúsh biriktirip jatyr. Onyń ishinde DDSU men BUU basty ról oinaidy.
«Bul uiymdar arnaiy qor qurdy. Bul qor 40 vaktsinany júrgizedi. 2021 jyldyń ortasyna taman búkilálemdik vaktsinatsiia bastalady. Ary ketkende keler jyldyń sońyna deiin vaktsinatsiia aiaqtalýy tiis. Onyń ishinde 40 memleketke vaktsina tegin jetkiziledi. DDSU taratqan aqparatqa sensek, Qazaqstan bul elder qataryna kirmeidi. Biz ózimiz vaktsina satyp alamyz. Múmkin halyqaralyq kómek kórsetiler», - dedi ol.
Eń bastysy, vaktsina - qaýipsiz ári tiimdi.
Mamannyń aitýynsha, halyqaralyq tájiribege sáikes 1 vaktsinany oilap tabý úshin 10-15 jyl ýaqyt ketedi.
«Bizde qazir ondai ýaqyt joq. Qazir álemniń ǵylymi ortalyqtary tyǵyz ýaqytta aldyńǵy jasalǵan vaktsina negizderine arqa súiei otyryp jańa baza jasap jatyr», - dedi ol.
Immýnologtyń aitýynsha, kei elderde vaktsina oilap tabyldy. Qazir olar erikti adamdarǵa salynyp, klinikalyq synaqtan ótip jatyr.
«Vaktsina qandai bolsa da, onda tiri virýs bolmaidy. Tiri vaktsina - poliomelit vaktsinasy. Bul - óte tiimdi vaktsina. Alaida, kóptegen kóshbasshy kompaniialar tiri vaktsina jasaýmen ainalyspaidy. Koronavirýs vaktsinasy jasandy bolary yqtimal. Bul materialda qozdyrǵysh antigeniniń aqparaty ǵana bolady. Álsiz qozdyrǵyshtar bolmaidy. Iaǵni, adamdarǵa virýs juqpaidy. Bul - óte qýanyshty jait», - dedi ol.
Elmira Bitanova tekserilmegen vaktsina esh jerde paidalanylmaitynyn aitty.
