Halyqaralyq hokkei federatsiiasy (HHF) koronavirýstyń taralýyna bailanysty naýryz aiyndaǵy 6 halyqaralyq týrnirdiń ótpeitinin málim etti, dep habarlaidy "Ult aqparat" HHF saityna silteme jasap.
Erler arasynda U-18 jasóspirimder álem chempionatynyń ekinshi diviziondaǵy A tobynda (22-28 naýryzda Tallinde josparlanǵan) jáne V tobynda (23-29 naýryz Sofiiada), sondai-aq úshinshi diviziondaǵy A tobynda (16-22 naýryz Ystanbulda) jáne V tobynda (29 naýryzdan 4 sáýirge deiin Liýksembýrgtiń Kokkelshoierinde) oiyndar ótpeitin boldy.
Áielder arasynda álem chempionatynyń birinshi diviziondaǵy V tobynda (28 naýryzdan 3 sáýirge deiin Polshanyń Katovitsa qalasy) jáne ekinshi diviziondaǵy A tobynda (29 naýryzdan 3 sáýirge deiin Ispaniianyń Hake qalasyn) jarystar toqtatyldy.
Budan bólek, hokkeiden Qazaqstan áielder quramasy Polshanyń Katovitsa qalasyndaǵy álem chempionatyna (29 naýryz – 3 sáýir) qatysýy tiis edi. Alaida, Halyqaralyq hokkei federatsiiasynyń meditsina komiteti senbi, 1 naýryz kúni Býdapeshte ótkizgen otyrys barysynda bul týrnirdi keiinge shegerý usynysyn jasady.
«Meditsina komitetine usynys jasaǵany úshin alǵys aitqym keledi, sondai-aq Keńes múshelerine osyndai qiyn kezeńde usynysty qoldaǵany úshin yqylasymdy bildiremin. Biz kún saiyn elderdegi jaǵdaidy baqylap otyramyz», - dedi HHF prezidenti Rene Fazel.
Aita keteiik, 2020 jyly Áielder arasynda ótetin shaibaly hokkeiden álem chempionatynyń jáne 2020 jyldyń sáýir jáne mamyryna josparlanǵan basqa da chempionattardyń kestesine ózgeris engizilgen joq.
Eske salaiyq, Qazaqstan Respýblikasynyń Ulttyq Olimpiadalyq komiteti koronavirýsqa bailanysty otandyq sportshylar úshin ahýaldyq shtab qurǵan bolatyn.
