Elordada koronavirýs juqtyrǵan 14 naýqaspen bailanysqan adamdardyń tizimi jasalýda, dep habarlaidy QazAqparat.
Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova aitty.
«JRVI-men elordada statsionarda jatqan áieldiń otbasyndaǵy bir adam Germaniiadan kelgen bolatyn. Bailanysqan adamdar retinde ony baqylaýǵa aldyq. 16 naýryz kúni áieldiń boiynan klinikalyq belgiler baiqalǵanda, birden aýrýhanaǵa jatqyzylyp, tekserildi. Búgin koronavirýstyq infektsiia anyqtaldy», - dedi basqarma basshysy Ortalyq kommýnikatsiialar qyzmetindegi brifingte
Al Ońtústik Koreia men Italiiadan kelgen 4 qazaqstandyq ta 16 naýryzda reisten túsirilip, oqshaýlanǵan. Endi olarmen bailanysqan adamdardyń tizimi jasalýda.
«Qazirgi ýaqytta epidemiologiialyq sharalar júrgizip jatyrmyz. Iaǵni, naýqastarmen bailanysqan adamdardy anyqtaimyz. Keiinirek, bailanysta bolǵan adamdardyń sanyn, jasy men jynysyn tolyq habarlaimyz», - dedi S. Qisyqova.
Onyń aitýynsha, 14 adamnyń beseýi qaladaǵy infektsiialyq bloktyń statsionarynda jatqan. Qalǵan 9 adam da búgin aýrýhanaǵa jatqyzyldy.
«Olardyń barlyǵy – Qazaqstan Respýblikasynyń azamattary. 5 adam elimizdiń ózge óńirleriniń turǵyndary, bir adam – Nur-Sultanda ýaqytsha turyp jatqan, qalǵany – elorda turǵyndary», - dedi S. Qisyqova.
Aita keteiik, Nur-Sultanda koronavirýs boiynsha taǵy 14 jańa naýqas tirkeldi.
Buǵan deiin basqarma basshysy koronavirýs juqtyrǵan 14 jańa naýqastyń jai-kúii týraly aityp berdi.
Osylaisha, qaýipti indetpen aýyrǵandar sany 27-ge jetti. Onyń ishinde 16 jaǵdai - Nur-Sultanda, 11 fakti - Almatyda tirkelgen.
Sondai-aq, Qazaqstanda tótenshe jaǵdai jariialanyp, azamattardyń 15 sáýirge deiin el aýmaǵynan shyǵýyna tyiym salyndy.
