Nur-Sultan qalasynyń Qoǵamdyq densaýlyq saqtaý basqarmasynyń basshysy Sáýle Qisyqova koronavirýs juqtyrǵan qazaqstandyqpen bir bortta bolǵan 14 azamattyń qai óńirlerge tarap ketkenin aityp berdi, dep habarlaidy QazAqparat.
«Olar saý azamattar. Olar koronavirýs juqtyrǵan adammen bailanysta bolǵandar. 14 azamatymyz óńirlerge tarap ketken. Olar barǵan jerinde anyqtalyp, statsionarlarǵa oqshaýlandy. Olar Almaty, Atyraý, Stepnagorsk jáne Qaraǵandy qalalarynda», - dedi Sáýle Qisyqova OKQ-da ótken baspasóz máslihatynda.
Eske sala ketsek, 14 naýryzda elordada ótken baspasóz máslihatynda Densaýlyq saqtaý ministri Eljan Birtanov Qazaqstanda eki adamnyń koronavirýs juqtyrǵanyn jetkizgen edi. Kóp ýaqyt ótpei Milan qalasynan Nur-Sultanǵa kelgen taǵy bir qazaqstandyqtan koronavirýs infektsiiasy tabyldy.
Keiin Germaniiadan ushyp kelgen Qazaqstan azamatynan koronavirýs anyqtaldy.
Al búgin taǵy eki azamattyń osy dertti juqtyrǵany belgili boldy. Osylaisha bul dertke shaldyqqandar sany 6 adamǵa jetip otyr.
