Aqtóbede taǵy da eki adamnan indet anyqtaldy. Al bailanysta bolǵan adamdaryn jasyryp qalǵan aqtóbelikke qatysty qylmystyq is qozǵalýy múmkin, dep habarlaidy "Ult aqparat".
Aqtóbe oblysynda keshe 1 adamnan, búgin tańerteń taǵy 1 adamnan koronavirýs infektsiiasy anyqtaldy. Qazir barlyǵy 13 adamnyń indet juqtyrǵany belgili.
«Búgin saǵat 8:35-de bir adamnan indet anyqtaldy. Ol buryn koronavirýs juqtyrǵan adammen bailanysta bolǵan. Qazir barlyǵy 13 adam tizimge ilindi. Keshe jáne búgin tirkelgen derekke toqtalsam, olar 2 sáýir kúni aýyryp, jeke emhanaǵa barǵan er adammen bailanysta bolǵan. Sol er adam týysynyń úiine barǵanyn, oǵan zat qaldyrǵanyn bizden jasyryp qaldy. Qylmystyq kodekstiń «Adamdardyń ómirine nemese densaýlyǵyna qaýip tóndiretin mán-jailar týraly aqparatty jasyrý» baby boiynsha material jinaqtalyp, quqyq qorǵaý organdaryna jiberiledi. Eger onyń kinási dáleldense, jaýapqa tartylady. Sonymen birge juqtyrǵan adamy kóz jumsa, 5 jyldan 10 jylǵa deiin bas bostandyǵynan aiyrylýy múmkin», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva. Qazirgi kezde sońǵy tirkelgen naýqas turǵan úidiń podezi karantinge jabyldy. Dezinfektsiialaý jumysy júrgizildi. Barlyǵy 28 adam baqylaýǵa alynyp, qarym-qatynasta bolǵan 6 adam oqshaýlandy.
Aita keteiik, virýs juqtyrǵan aqtóbelik birneshe ret azyq-túlik sýpermarketine barǵan. Oblystyq taýarlar men kórsetiletin qyzmetter sapasy men qaýipsizdigin baqylaý departamenti ony karantinge jabýǵa sheshim qabyldady. Sonymen birge saýda ornynyń jumysshylary da úidegi karantinde bolady.
«Aqtóbe qalasynda karantin rejimi jalǵasady. Barlyq shekteýler óz kúshinde. Qandai da bir qajettilik bolmasa, dalaǵa shyǵýǵa bolmaidy. Úiden jumysqa, jumystan týra úige barý qajet. Dárihanaǵa barsa da birden úiine oralǵany durys», - deidi Nursulý Berkimbaeva.
