6 myńnan astam meditsina qyzmetkerine COVID-19 infektsiiasyn jáne pnevmoniiany juqtyrýyna bailanysty birjolǵy tólem berildi, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginiń baspasóz qyzmetiniń málimetinshe, COVID-19-ben kúreske jumyldyrylǵan 6 006 meditsina qyzmetkeri koronavirýs infektsiiasyn nemese virýstyq pnevmoniiany juqtyrǵan jaǵdaida beriletin birjolǵy áleýmettik tólemdi memlekettik áleýmettik saqtandyrý qorynan aldy. Atalmysh qor aýrý saldarynan qaitys bolǵan 182 meditsina qyzmetkeriniń týystaryna tólem aýdardy.
Atalǵan tólem tólenetin meditsina qyzmetkerlerin óńirlerdiń jáne respýblikalyq mańyzy bar qalalardyń densaýlyq saqtaý basqarmalary janyndaǵy arnaiy komissiia aýyrǵan meditsina qyzmetkerin tekserý nátijesi negizinde anyqtaidy. Ótinimdi jinaqtaýdy QR Densaýlyq saqtaý ministrligi júzege asyrady, odan keiin ótinimder elektrondyq is maketterin qalyptastyrý úshin «Azamattarǵa arnalǵan úkimet» memlekettik korporatsiiasyna beriledi, sodan soń tólem taǵaiyndaý úshin memlekettik áleýmettik saqtandyrý qoryna jiberiledi.
«14 qazan saǵat 9.00-degi jaǵdai boiynsha MÁSQ COVID-19 nemese virýstyq pnevmoniia juqtyrǵan 6 006 meditsina qyzmetkerdiń ótinishi boiynsha jáne aýrýdyń saldarynan qaitys bolǵan 182 meditsina qyzmetkerine qatysty aqshalai qarajatty taǵaiyndaý men tóleýdi júzege asyrdy», delingen habarlamada.
Tólemdi COVID-19-ben kúreste qaitys bolǵan barlyq meditsina qyzmetkeriniń týystary aldy.
Óńirler bólinisinde meditsina qyzmetkerlerine COVID-19 nemese virýstyq pnevmoniiany juqtyrý jaǵdaiyna tólemderdiń eń kóbi Nur-Sultan (1 105) jáne Almaty (560) qalalary jáne Qaraǵandy (551), Shyǵys Qazaqstan (507) jáne Atyraý (470) oblystary boiynsha júrgizildi.
Esterińizge sala keteiik, QR Eńbek jáne halyqty áleýmettik qorǵaý ministri men QR Densaýlyq saqtaý ministriniń 9 sáýirdegi «Densaýlyq saqtaý uiymdarynyń COVID-19 koronavirýs infektsiiasyna qarsy kúres jónindegi epidemiiaǵa qarsy is-sharalarǵa tartylǵan qyzmetkerleri atalǵan infektsiiany juqtyrǵan nemese odan qaitys bolǵan jaǵdaida olarǵa birjolǵy áleýmettik tólemdi júzege asyrý qaǵidalaryn bekitý týraly» birlesken buiryǵyna 22 shildede engizilgen ózgeristerge sáikes, joǵaryda kórsetilgen tólem:
– koronavirýs infektsiiasy nemese virýstyq pnevmoniia juqtyrǵan meditsina qyzmetkerlerine – 2 mln teńge;
– COVID-19 koronavirýstyq infektsiiasyn juqtyrǵannan, virýstyq pnevmoniiamen aýyryp qaitys bolǵan jaǵdaida olardyń otbasyna – 10 mln teńge kóleminde tólenedi.
