Qazaqstan meditsina ýniversitetiniń epidemiologiia, biostatistika jáne dáleldi meditsina kafedrasynyń dotsenti Rafail Qypshaqbaev koronavirýs vaktsinasy adamnyń genetikalyq kodyna qalai áser etetinin aitty, dep habarlaidy QazAqparat.
«Genetikalyq mýtatsiialar týraly aitsaq, adamnyń DNQ-sy óte qorǵalǵan qurylym deýge bolady. Ol árkim bir ekpeniń kómegimen ózgerte salatyn osal dúnie emes. Ondai bolsa, adam balasy milliondaǵan jyl boiy ómir súrip, búginge jetpes edi. Bul bizdiń genetikalyq kodymyz senimdi qorǵalǵan júie ekenin kórsetedi. Muny bir deńiz. Ekinshiden, vaktsina adamnyń genetikalyq kodyn ózgertedi dep daýryǵyp júrgender 6-synypta biologiia sabaǵyn qashyp-pysyp oqyǵan shyǵar. DNQ-ǵa vaktsina arqyly enip, genetikalyq kodty ózgertý múmkin emes. Sózime senbegender 6-synyptyń biologiia oqýlyǵyn ashyp oqysyn. Úshinshiden, shynyn aitý kerek, teoriialyq turǵyda kez kelgen dárilik zattyń áserinen asqynýlar paida bolýy múmkin», - degen Rafail Qypshaqbaev vaktsinatsiiadan keiingi asqyný yqtimaldyǵy bar ekenin, biraq paidasymen salystyrǵanda shamaly ekenin aitty.
Sondai-aq, ǵalym koronavirýs infektsiiasymen aýyryp shyqqandarǵa «immýnitetim bar» dep arqany keńge salýǵa bolmaitynyn eskertti.
«Óitkeni qaita juqtyrý jaǵdailaryn eshkim joqqa shyǵara almaidy. Koronavirýspen aýyryp turý qarsy immýnitet qalyptastyrý degen sóz emes. Immýnitettiń qanshalyqty qalyptasýy syrqattyń aýyrtpalyǵyna, adam aǵzasynyń jeke erekshelikterine bailanysty. Koronavirýspen aýyryp immýnitet qalyptastyrý jáne vaktsina arqyly immýnitet qalyptastyrýdyń aiyrmashylyǵyn bylai túsindirýge bolady. Vaktsinatsiia adam aǵzasyn yqtimal infektsiiany barynsha ońai ótkerýge daiyndaityn jattyǵý siiaqty. Koronavirýspen aýyrý vaktsinatsiiaǵa qarsy meditsinalyq kórsetilim bolmaýy kerek», - dedi Rafail Qypshaqbaev.
