Teńiz ken ornyndaǵy vahta qalashyǵynda koronavirýs juqtyrǵan áielmen bailanysta bolǵandar karantin tártibin qatań buzyp otyr, - dep habarlaidy "Ult aqparat".
Atyraý oblysy bas sanitar dárigeriniń aitýynsha, TShO merdiger kompaniialarynyń birinde jumys isteitin qyzmetker virýs juqtyrǵan. 50 jastaǵy áiel búginde infektsiialyq statsionarda em alyp jatyr. Onymen jaqyn qarym-qatynasta bolǵan 9 adam koronavirýsty anyqtaý úshin test tapsyrdy. Olardyń eshqaisynda indet joq bolyp shyqty. Áielder ózderinen virýs tabylmaǵan sáttegi qýanyshyn videoǵa túsirip, áleýmettik jelide taratyp jibergen.
Sondai-aq olar izoliatordan ketip qalǵan. Medpersonaldyń aitqanyna baǵynbai, karantin aiasyndaǵy talaptardy saqtamai otyr. Muny sol áielder jumys isteitin kompaniia basshylyǵy rastady. Atalmysh mekeme olarǵa qatysty shara qoldanýǵa ýáde berdi.
Sonymen qatar, 27 naýryz kúni ushyp kelgen Ystanbul-Atyraý reisiniń 57 jolaýshysy «Bereke» yqshamaýdanyna aýystyryldy. Olardyń árqaisysy bir páterge jaiǵasyp, oqshaýlandy.
Eske sala keteiik, sońǵy eki kúnde qaita testileý kezinde karantinge jatqyzylǵan birneshe adamnan koronavirýs tabylǵan edi. Sondyqtan olarmen bailanysta bolǵandardy «Berekege» aýystyrý týraly sheshim qabyldanǵan. 26 naýryzda ushyp kelgen Amsterdam-Atyraý reisiniń 15 jolaýshysy da osynda kóshirildi.
Qazirgi tańda Atyraý oblysynda COVID-19 infektsiiasyn juqtyrǵan 42 adam bar.
