Búgin Atyraý oblysyndaǵy Teńiz kenishiniń 15 jumysshysynan koronavirýs tabyldy, - dep habarlaidy óńirlik jedel shtaby.
Tótenshe jaǵdai rejimin qamtamasyz etý jónindegi óńirlik jedel shtabtyń habarlaýynsha, 2 mamyrda tańerteń Jylyoi aýdanynda ornalasqan ken ornynyń 15 jumysshysynan qaýipti indettiń belgisi anyqtalǵan.
«Naýqastardyń arasynda 10 er adam (33, 43, 28, 26, 53, 27, 26, 50, 30, 45 jastaǵy) men 49, 42, 30, 48, 41 jastaǵy 5 áiel bar. Olar Teńiz kenishinde merdiger jáne qosalqy merdiger kompaniialarynda jumys istegen. Bári de osy kezge deiin koronavirýs juqtyrǵan naýqastarmen bailanys jasaǵany úshin karantindik statsionarda boldy. Olardan zerthanalyq analiz alynyp, PTR testileýdiń diagnostikalyq zertteýi nátijesinde koronavirýs infektsiiasy anyqtaldy», - dep habarlady óńirlik jedel shtabtan.
Qazir naýqastardyń jaǵdaiy qanaǵattanarlyq. Bekitilgen hattamaǵa sáikes, em qabyldap jatyr. Olarmen bailanysta bolǵandar anyqtalyp, meditsinalyq baqylaýǵa alyndy. Qaýipti indet oshaqtarynda dezinfektsiialyq jumys júrgizilýde.
Búgin Atyraý oblysynda koronavirýs juqtyrǵandar sany 161-ge jetti. Onyń 97-si Teńiz ken ornynyń jumysshysy.
Eske sala ketelik, 16 sáýirden bastap Teńiz kenishinen shuǵyl emes personaldy shyǵarý bastalǵan bolatyn. 30 sáýirde Teńiz kenishinde koronavirýsqa shaldyqqandarmen bailanysta bolǵan 1,5 myńnan astam jumysshy anyqtalǵan edi.
