Qazaqstanda koronavirýsqa bailanysty statsionarlyq karantinge jatqyzylǵandar sany 1 644 adamǵa jetti.
Bul jaiynda QR Densaýlyq saqtaý ministrliginen málim etti, dep habarlaidy "Ult aqparat".
«Búginde elimizde koronavirýs juqtyrǵan 9 naýqas, onyń ishinde Almaty qalasynda – 7, Nur-Sultan qalasynda 2 adam tirkelgen. Statsionarlyq karantinde - 1 644, úi karantininde 628 adam jatyr. Sonymen qatar QHR-dan jáne shekaralas memleketterden kelgen azamattarǵa monitoring jalǵasýda», - dep atap ótedi ministrlikten.
Vedomstvonyń málimetinshe, barlyq sanattar boiynsha monitoringke 2 537 adam alyndy. Onyń ishinde 1 «A» sanaty boiynsha – 1 626, 1 «B» sanaty boiynsha – 564, 2-sanaty boiynsha 347 adam bar. Monitoringke alynǵan 2 537 adamnyń 480-ine baqylaý toqtatyldy. 2 057 adamǵa monitoring júrgizilýde.
«Qazirgi ýaqytta dene qyzýymen jáne JRVI belgilerimen 125 adam aýrýhanaǵa jatqyzyldy. Onyń ishinde 1 «B» sanaty boiynsha – 38 adam, 2-sanat boiynsha – 42 adam 3-sanat boiynsha - 45 adam. Aýrýhanaǵa jatqyzylǵandar sany 125, 65 azamat shyǵaryldy. 60 adam statsionarda qalady. Bas memlekettik sanitarlyq dárigerdiń qaýlysymen atalǵan patsientter algoritmge sáikes infektsiialyq statsionarǵa jatqyzyldy. Epidemiiaǵa qarsy qajetti sharalar, onyń ishinde oqshaýlaý, emdeý jáne zararsyzdandyrý jumystary júrgizilýde. Jaǵdai QR Densaýlyq saqtaý ministrliginiń turaqty baqylaýynda»,- delingen taratylǵan aqparatta.
