Koronavirýstyń taralý qaýpi tónip turýyna bailanysty jolǵa shyqpai qalǵandardyń biletterin áýe kompaniialary eshqandai aiyppulsyz qaitaryp beredi. Bul týraly Ortalyq kommýnikatsiialar qyzmeti alańynda ótken koronavirýstyq infektsiia boiynsha aǵymdaǵy jaǵdaiǵa arnalǵan baspasóz máslihatynda aityldy, dep habarlaidy "Ult aqparat".
«Búgingi kúni biz áýe reisterin toqtatyp otyrǵan joqpyz, qysqartyp otyrmyz. Mysaly, Nur-Sultan - Ystanbul baǵyty boiynsha 30 reis 6 reiske qysqardy. Bizde aviatsiialyq ákimshilik qurylǵan. Ol jerde táýlik boiy bailanys nómirleri jumys isteidi. Jolǵa shyqpai qalǵandardyń biletterin áýe kompaniialary eshqandai aiyppulsyz qaitaryp beredi. Al biletti basqa kúnge aýystyrý qajet bolsa, ol jaǵy da qarastyrylǵan», - deidi QR Indýstriia jáne infraqurylymdyq damý vitse-ministri Berik Qamaliev.
Sondai-aq, QR Densaýlyq saqtaý ministri Eljan Birtanov qaýipti jaǵdai týraly halyqqa 6 qańtar kúni eskertilgeni týraly aitty.
«6 qańtar kúni koronavirýsqa bailanysty alǵashqy baspasóz máslihaty ótken. Odan keiin 13, 20 qańtarda, iaǵni aptasyna bir ret osyǵan qatysty brifing ótip otyrdy. Qaýipti jaǵdaiǵa bailanysty shetelge barý týraly jospardy toqtatý kerektigi týraly eskertkenbiz. Azamattardyń ózderinde de jaýapkershilik bolýy kerek. Bizdiń keńesimizge qulaq aspaǵandyqtan osyndai jaǵdailar bolyp jatyr. Koronavirýs juqtyrý qaýpi joǵary memleketterge barýdan bas tartý kerek», - deidi ol.
