كوروناۆيرۋستىڭ تارالۋ قاۋپٸ تٶنٸپ تۇرۋىنا بايلانىستى جولعا شىقپاي قالعانداردىڭ بيلەتتەرٸن ەۋە كومپانييالارى ەشقانداي ايىپپۇلسىز قايتارىپ بەرەدٸ. بۇل تۋرالى ورتالىق كوممۋنيكاتسييالار قىزمەتٸ الاڭىندا ٶتكەن كوروناۆيرۋستىق ينفەكتسييا بويىنشا اعىمداعى جاعدايعا ارنالعان باسپاسٶز مەسليحاتىندا ايتىلدى, دەپ حابارلايدى "ۇلت اقپارات".
«بٷگٸنگٸ كٷنٸ بٸز ەۋە رەيستەرٸن توقتاتىپ وتىرعان جوقپىز, قىسقارتىپ وتىرمىز. مىسالى, نۇر-سۇلتان - ىستانبۇل باعىتى بويىنشا 30 رەيس 6 رەيسكە قىسقاردى. بٸزدە اۆياتسييالىق ەكٸمشٸلٸك قۇرىلعان. ول جەردە تەۋلٸك بويى بايلانىس نٶمٸرلەرٸ جۇمىس ٸستەيدٸ. جولعا شىقپاي قالعانداردىڭ بيلەتتەرٸن ەۋە كومپانييالارى ەشقانداي ايىپپۇلسىز قايتارىپ بەرەدٸ. ال بيلەتتٸ باسقا كٷنگە اۋىستىرۋ قاجەت بولسا, ول جاعى دا قاراستىرىلعان», - دەيدٸ قر يندۋسترييا جەنە ينفراقۇرىلىمدىق دامۋ ۆيتسە-مينيسترٸ بەرٸك قاماليەۆ.
سونداي-اق, قر دەنساۋلىق ساقتاۋ مينيسترٸ ەلجان بٸرتانوۆ قاۋٸپتٸ جاعداي تۋرالى حالىققا 6 قاڭتار كٷنٸ ەسكەرتٸلگەنٸ تۋرالى ايتتى.
«6 قاڭتار كٷنٸ كوروناۆيرۋسقا بايلانىستى العاشقى باسپاسٶز مەسليحاتى ٶتكەن. ودان كەيٸن 13, 20 قاڭتاردا, ياعني اپتاسىنا بٸر رەت وسىعان قاتىستى بريفينگ ٶتٸپ وتىردى. قاۋٸپتٸ جاعدايعا بايلانىستى شەتەلگە بارۋ تۋرالى جوسپاردى توقتاتۋ كەرەكتٸگٸ تۋرالى ەسكەرتكەنبٸز. ازاماتتاردىڭ ٶزدەرٸندە دە جاۋاپكەرشٸلٸك بولۋى كەرەك. بٸزدٸڭ كەڭەسٸمٸزگە قۇلاق اسپاعاندىقتان وسىنداي جاعدايلار بولىپ جاتىر. كوروناۆيرۋس جۇقتىرۋ قاۋپٸ جوعارى مەملەكەتتەرگە بارۋدان باس تارتۋ كەرەك», - دەيدٸ ول.
