Biyl sáýir aiynda ústemeaqy alatyn meditsinalyq qyzmetkerler sany 45 myńǵa jetti.
Bul týraly «Áleýmettik meditsinalyq saqtandyrý qory» KEAQ Basqarma tóraǵasynyń orynbasary Marat Shoranov málim etti, dep habarlaidy QazAqparat.
«Jalpy, koronavirýspen kúres sharalaryna 56 mlrd teńge shamasynda qarjy bólindi. Sonyń ishinde 14,7 mlrd teńge infektsiialyq, karantindik jáne provizorlyq statsionarda jatqan naýqastarǵa arnalǵan. 5,4 mlrd teńge testilerge, infektsiialyq ári provizorlyq emhanalarda jasalatyn analizderge bólindi. Sonymen qatar, 36 mlrd teńge dárigerlerimiz eńbekaqysyna qosymsha tólem berý úshin arnalǵan», - dep toqtaldy M. Shoranov onlain baspasóz máslihatynda.
Onyń sózine qaraǵanda, el óńirlerinde epidemiologiialyq jaǵdai ártúrli boldy. Óńirlerdegi alǵashqy naýqastar naýryz aiynyń sońyna qarai anyqtala bastady. Sáikesinshe, naýryz aiynda jumyldyrylǵan meditsinalyq qyzmetkerler sáýir aiymen salystarǵanda aitarlyqtai az boldy.
«Ásirese, bul jaǵdai Nur-Sultan men Almaty qalalarynda qiyndaý boldy. Jalpy, elimiz boiynsha naýryz aiynda 17 700 meditsina qyzmetkeri ústemeaqy aldy. Tólemniń jalpy somasy 3,4 mlrd teńgeni qurady. Alaida, epidemiologiialyq jaǵdai sáýir aiynyń basynda ýshyǵa tústi, osy oraida jumyldyrylǵan qyzmetkerler sany da artty. Bul turǵyda elimizdiń ár óńirinen aldyn ala málimetter berildi. Sáýir aiynda ústemeaqy alýǵa úmitker meditsinalyq qyzmetkerlerler sany 45 myń adamǵa jetti, iaǵni olardyń sany naýryz aiyna qaraǵanda úsh esege jýyq artty», - dedi M. Shoranov.
Onyń aitýynsha, aldaǵy kúnderi óńirlik komissiialar tiisti jumystardy aiaqtap, Áleýmettik meditsinalyq saqtandyrý qoryna tizimderdi jiberedi.
«Biz óz kezegimizde qarjyny ár meditsinalyq uiymǵa, negizgi jetkizýshilerge bólemiz. Al meditsinalyq qyzmetkerlerdiń shotyna aqshany aýdarý sharalary bizben shartqa otyrǵan meditsinalyq uiymdardyń mindeti», - dedi ol.
Osy oraida Marat Shoranov sáýir aiynda jumys istegen 45 myń adamǵa shamamen 14,7 mlrd teńge bólinýi múmkin ekendigin jetkizdi.
