Koronavirýs infektsiiasynyń bastan keshirgen keibir patsientterde sozylmaly sharshaý sindromy baiqalady. Munyń sebebin Ulttyq ǵylymi kardiohirýrgiia ortalyǵy tóraǵasynyń mindetin atqarýshy Mahabbat Bekbosynova túsindirip berdi, dep habarlaidy QazAqparat.
«Elimizde postkovidtik sindrom syndy problemanyń kóterilip, talqyǵa túsip jatqany qýantady. Óitkeni, qazirgi ýaqytta kún saiyn Covid juqtyrǵan patsientterdiń sany álemde de, elimizde de artyp kele jatqany belgili. Buǵan qosa, aýrýdybastan keshirgen patsientterdiń kópshiligi bizde túrli shaǵymmen kelip jatyr. Máselen, taiaýda qabyldaýymyzǵa bir áiel kelip, qalypty ómirge orala almai júrgendigine shaǵymdanǵan edi. Alaida, ol ózin ne mazalaityndyǵyny túsindirip bere almady», - dedi Mahabbat Bekbosynova.
Onyń atap ótýinshe, Chadera dep atalatyn shkala bar. Atalǵan shkala patsienttiń jai-kúiin barynsha jan-jaqty baǵalaýǵa múmkindik beredi.
«Patsient ózin ne mazalaitynyn túsindire almaǵan, biraq qalypty ómirge orala almai júrgenin túsingen kezde sozylmaly sharshaýǵa ushyraǵan deýge bolady. Mine osy kezde atalǵan shkala sol patsienttiń jai-kúiin shynaiy baǵalaýǵa múmkindik beredi. Shkalada 11 ball bar. Patsienttiń jai-kúii 3 ballaǵa deiin bolsa, onda qalypty sanalady. Al 4-ten 11 ballǵa deiingi aralyq patsientte qandaida bir problemanyń bar ekendigin bildirdi jáne oǵan nevrologqa nemese psihoterapevtke qaralýy qajet. Shyndyǵyna kelgende bizde koronavirýsty bastan keshirgen patsentterdi tekserý hattama bar. Ol zerthanalyq, sonymen qatar instrýmentaldy zertteý ádisterin qamtidy. Patsient qanynan jalpy saraptama alamyz. Óitkeni, qan immýndyq júieniń qandai jaǵdaida ekenin jaqsy kórsetip beredi. Leikopeniia men limfotsitopeniia baqylaýynda áli kúnge deiin turǵan patsientter bar.Koronavirýsty bastan keshirgenderine 2-3 ai ótse de bul patsienterdiń immýndyq júiesinde problema bar degen sóz». - dedi ol.
Sonymen qatar ol patsientterdiń búiregi men uiqy beziniń, ókpesi men júreginiń qalai jumys istep turǵandaryn baqylaýǵa arnalǵan saraptamalardyń biohimiialyq spektri de júrgiziletindigin aitady. Sozylmaly sharshaý sindromyna shaldyqqan patsientterde tsitomegalovirýs pen Epshtein-Barr joǵary bolatyndyǵyna nazar aýdartady.
«Tsitomegalovirýs pen Epshtein-Barr árbir adamnyń aǵzasynda ómir súretin virýstar. Immýndyq júie jaqsy kútsde bolǵan kezde ol bul infektsiialardy aǵza ishinde baqylaýda ustap, olardyń tez kóbeiip ketýine jol bermeidi. Eger immýndyq júie álsirese, sol kezde túrli simptomdar, sindromdar paida bolady. Olardyń eń alǵashqysy – bul sozylmaly sharshaý sindromy men sozylmalyqabyný sindromy», - dedi Mahabbat Bekbosynova.
