Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qisyqova 19 naýryz kúni anyqtalǵan 7 naýqas týraly aityp berdi, dep habarlaidy QazAqparat.
Olardyń bireýi 18 naýryzda infektsiia juqtyrǵan naýqaspen bailanysta bolǵan adam retinde statsionarǵa túsken jáne 19 naýryzda óz boiynan da infektsiia tabylǵan.
«Aýrýhanaǵa túsken taǵy 6 naýqas ta jaqyn bailanysta bolǵandar tobynan. Olardyń úsheýinde tamaqtyń jybyrlaýy, qurǵaq jótel syndy belgiler baiqalǵan. Eki adamda sýbfebrildi dene qyzýy bolǵan. Qazirgi ýaqytta barlyq naýqastardyń jaǵdaiy qanaǵattanarlyq. Dene qyzýy qalypqa tústi. Olardy dárimen emdeý diagnostikalaý men emdeýdiń klinikalyq hattamasyna sáikes júrgizilýde», - dedi basqarma basshysy qala ákimdiginde ótken onlain brifingide.
Sáýle Qisyqovanyń aitýynsha, sońǵy 7 oqiǵa boiynsha bailanysta bolǵan adamdar jáne otbasy músheleri anyqtalyp, 30 adam aýrýhanaǵa jatqyzylǵan. Bailanysta bolýy yqtimal adamdar úi karantinine jabyldy.
«Nur-Sultan qalasy boiynsha tirkelgen barlyq 25 jaǵdai boiynsha jaqyn bailanysta bolǵan 244 adam Nur-Sultan men ózge óńirlerdegi aýrýhanalarǵa jatqyzyldy. 327 adam úi karantininde jatyr, olarǵa kún saiyn meditsinalyq mamandar habarlasyp turady», - dedi S. Qisyqova.
Buǵan deiin basqarma basshysy Nur-Sultanda kornavirýs juqtyrǵandardyń basym bóligi 30-49 jas aralyǵynda ekenin málimdegen edi.
Eske sala ketsek, Qazaqstanda qazir 49 koronavirýs infektsiiasyn juqtyrǵan adam tirkelgen. Almatyda – 22 adam, Qaraǵandy qalasynda - 2 adam, Nur-Sultanda - 25 adam tirkelgen.
