Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova elordada koronavirýs infektsiiasymen tirkelgen sońǵy 20 naýqas týraly aityp berdi, dep habarlaidy "Ult aqparat".
«20 naýqastyń 14-i — statsionarlyq emdeýde jatqan naýqas. Olardyń bir bóligi ókpe qabynýy kúdigimen JRVI belgilerimen jáne dene qyzýymen aýrýhanaǵa túsken. Ekinshi bir bóligi – 24-25 naýryzda koronavirýstyq infektsiia anyqtalǵan adamdarmen jaqyn bailanysta bolǵany úshin tekserýge alynǵandar. Sonymen birge, naýqastar arasynda ózge elderden ushyp kelip, oqshaýlanǵan adamdar da bar», - dedi basqarma basshysy «Habar 24» telearnasynda ótken brifingte.
Onyń aitýynsha, 6 jaǵdai Nur-Sultan qalasy turǵyndary arasynda júrgizilgen monitoring barysynda tirkelgen.
«Qazirgi ýaqytta Nur-Sultanda 61 adamnan koronavirýstyq infektsiia tabylyp, statsionarda jatyr. Tórt naýqastyń jaǵdaiy – turaqty aýyr. Olardyń ókpe qabynýy rastaldy jáne tynys jetispeýshiligi bar. Koronavirýstyq infektsiia boiynsha hattamaǵa sáikes em-dom alyp jatyr. Qalǵan naýqastardyń jaǵdaiy qanaǵattanarlyq, shaǵym joq, dene qyzýy qalypty», - dedi Sáýle Qisyqova.
Aita keteiik, Qazaqstan Respýblikasy aýmaǵynda koronavirýs infektsiiasyn juqtyrǵan jalpy 109 naýqas tirkeldi.
Nur-Sultan qalasynda 61 adamda koronavirýs infektsiiasy anyqtaldy. Almaty qalasynda - 40 adam, Shymkent qalasynda – 2 adam, Qaraǵandy qalasynda - 2, Almaty, Aqtóbe, Jambyl, Soltústik Qazaqstan oblystarynda – 1 adamnan tirkelgen.
