Nur-Sultan qalasy boiynsha koronavirýs infektsiiasynyń taralýyna jol bermeý jónindegi jedel shtab azyq-túlik dúkenderi ieleriniń mindetterin bekitti, dep habarlaidy "Ult aqparat".
Jedel shtab bul mindetterdi qalalyq ákimdiktiń resmi saitynda jariialady.
Jedel shtab, atap aitqanda, azyq-túlik taýarlaryn satatyn azyq-túlik saýda jelileriniń, sýpermarketterdiń, shaǵyn marketterdiń, turǵyn úilerdiń janyndaǵy dúkenderdiń, saýda ortalyqtarynyń, saýda úileriniń, bazarlar janyndaǵy azyq-túlik bólimderiniń menshik ielerine birqatar mindet júktedi. Naqtyraq aitqanda olar sanitariialyq jáne dezinfektsiialyq sharalardy mindetti saqtai otyryp, shtattyq rejimde obektilerdiń úzdiksiz jumysyn júrgizýge mindettelgen. Sonymen qatar, qyzmetkerlerdi jeke qorǵanysh quraldarymen (meditsinalyq betperdeler, perchatkalar jáne t.s.s), sanitaizerlerdi ornatyp, áleýmettik mańyzy bar azyq-túlik taýarlaryna jáne birinshi qajettiliktegi taýarlarǵa baǵalardyń ósýine jol bermeýi tiis.
Sondai-aq, bir qolǵa qant, kúrish, qaraqumyq sekildi ónimderdi 5 kelige deiin, kúnbaǵys maiyn 5 litrge deiin satylýyn shekteýi kerek. Odan bólek nan-toqash, konditerlik ónimderdi, keptirilgen jemisterdi (jańǵaqtar, órikter, júzim jáne t.b.) qaptalǵan túrinde ótkizýdi qamtamasyz etýi kerek.
