Qazaqstan azamaty koronavirýs juqtyrǵan koreilik tamaqtanǵan qoǵamdyq orynda bolǵan. Bul týraly QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«2020 jyldyń 3 naýryzynda Ońtústik Koreianyń áleýmettik jelileriniń orys tildi toptarynda Ońtústik Koreiada zańsyz júrgen Qazaqstan Respýblikasynyń azamaty koronavirýske shaldyqqany rastaldy degen aqparat tarady. Atalǵan áleýmettik jelilerdiń habarlaýynsha, Qazaqstan azamaty klinikadan qashyp ketip, qazirgi ýaqytta politsiiamen izdestirilýde. Mundai aqparat «Habar 24» telearnasynda da habarlanǵan. Qazaqstannyń Ońtústik Koreiadaǵy Elshiligi tiisti sharalar júrgizip, onyń nátijesinde bul aqparat rastalmady. Jergilikti politsiia jáne bizdiń azamatpen bailanys ornatylǵan. Ol buǵan deiin klinikaǵa barmaǵanyn jáne koronavirýs bar-joǵyn anyqtaityn qandai da bir saraptama tapsyrmaǵanyn aitty», - dedi resmi ókil.
Onyń aitýynsha, korei politsiiasynyń aqparatyna sáikes, osydan birneshe kún buryn qazaqstandyq azamat koronavirýske shaldyqqan adam barǵan qoǵamdyq tamaqtaný ornynda bolǵan.
«Osyǵan bailanysty belgilengen tártipke sáikes, oǵan jáne sol ýaqytta atalǵan orynda bolǵan barlyq adamdarǵa eger aýrýdyń syrtqy belgileri baiqalǵan jaǵdaida virýstyń bar-joǵyn anyqtaý testin tapsyrý qajet. Otandasymyz barlyq qajetti meditsinalyq protsedýralardan ótýge jáne jergilikti bilikpen yntymaqtasýǵa daiyn. Bizdiń Elshilik koronavirýs Ońtústik Koreia aýmaǵynda anyqtalǵan alǵashqy kúnnen bastap jergilikti Ishki ister ministrligimen jáne Aýrýlardy baqylaý, aldyn alý korei ortalyǵymen tyǵyz jumys istep keledi. Atalǵan ortalyqtyń usynysy boiynsha bizdiń otandasymyz telefon arqyly kúndelikti densaýlyǵyna baqylaý júrgizip, úi karantininde bolýy qajet. Bul usynys aýrýdyń syrtqy belgileri joqtyǵyna negizdelgen jáne ony emdeýge jatqyzýdan jáne koronavirýstyń bolýyn testileýden bas tartyldy», - dedi Aibek Smadiiarov.
Resmi ókil Qazaqstannyń Ońtústik Koreiadaǵy Elshiligi bul máseleni turaqty baqylaýǵa alǵanyn basa aitty.
«Joǵaryda baiandalǵanǵa bailanysty QR Syrtqy ister ministrligi BAQ ókilderine tekserilmegen aqparatty jariialap, dúrliktirmeýdi jáne úrei týdyrmaýdy suraidy. Syrtqy saiasi vedomstvonyń resmi túsiniktemesin kútý qajet. Sonymen qatar, Qazaqstan azamattaryndaǵy koronavirýske qatysty aqparattar alý úshin QR Densaýlyq saqtaý ministrligine habarlasýdy suraimyz. Al Syrtqy ister ministrligi shet elderdegi bizdiń otandastarymyzǵa qatysty aqparatty tekserip, naqty málimet berýge tyrysady», - dedi ol.
