QR Prezidenti Qasym-Jomart Toqaev koronavirýspen kúres jumysyn úilestiretin Shuǵyl áreket etý ortalyǵyna bardy, dep habarlaidy "Ult aqparat".
«Koronavirýspen kúres jumysyn úilestiretin Shuǵyl áreket etý ortalyǵyna bardym. Qysqa merzimde qurylǵan Ortalyq qalyptasqan jaǵdaiǵa monitoring jasap, naýqastardy anyqtaý jáne esepke alý úshin ozyq tehnologiiany qoldanady», - dep jazdy Memleket basshysy Twitter-de.
Prezident atap ótkendei, ortalyqtyń negizgi mindetteriniń biri – halyqqa shynaiy aqparat berý.
«Jekelegen BAQ pen áleýmettik jelide jalǵan málimetter taralyp jatqan kezde bul óte mańyzdy. Koronavirýsqa qatysty barlyq resmi aqparat http://coronavirus2020.kz saitynda», - dep jazdy Q.Toqaev.
Búgin Almaty oblysynda koronavirýs indetin juqtyrýdyń alǵashqy jaǵdaiy anyqtaldy. 21 naýryz saǵat 12.00-degi jaǵdai boiynsha, Nur-Sultan qalasynda - 28 adam, Almaty qalasynda – 22 adam, Qaraǵandy qalasynda - 2, Almaty oblysynda - 1 adam, jalpy 53 naýqas tirkeldi.
