Koronavirýsqa qarsy reseilik vaktsinaǵa qatysty kúdik-kúmánderin buǵan deiin britandyq jáne italiialyq ǵalymdar bildirgen bolatyn. Osyǵan qaramastan, Qazaqstan nelikten osy elde jasalǵan vaktsinany tańdap otyr? Bul suraqqa búgin Ortalyq kommýnikatsiialar qyzmetindegi baspasóz máslihatynda QR Densaýlyq saqtaý birinshi vitse-ministri Marat Shoranov jaýap berdi, dep habarlaidy QazAqparat.
«Rasymen de, «SQ-Farmatsiia» kompaniiasymen jáne Resei Federatsiiasynyń Tikelei investitsiialar qory arasynda memorandým jasaldy. Ol memorandýmda klinikalyq zertteýlerdiń barlyq satysynan ótken jaǵdaida reseilik «Spýtnik-V» vaktsinasyn basym túrde jetkizý týraly aitylǵan. Iaǵni memorandým – naqty kelisimshart emes. Ol klinikalyq zertteýlerdiń barlyq satysynan ótken jaǵdaida ǵana, vaktsinalardy taldaý kezinde «Spýtnik-V» vaktsinasyna basymdyq bere otyryp, qarastyrýǵa kepildik beredi», - dedi Marat Shoranov.
Onyń aitýynsha, qazirgi ýaqytta qazaqstandyq vaktsinany synaqtan ótkizýdiń birinshi jáne ekinshi klinikalyq satylary sońyna taiap keledi.
«Bilim jáne ǵylym ministrligimen aýqymdy jumys júrgizilýde. Álem elderine qaraǵanymyzben vaktsinany naqty qashan, qalai jetkize alatyn memleketterdiń bary týraly aiqyn málimet joq. Kóbi halyqtyń 20 paiyzyn vaktsinamen qamtý múmkindikteri baryn alǵa tartyp, sonymen qatar vaktsinanyń tiimdiligi rastalmastan aldyn ala aqy suraidy. Osyǵan bailanysty, atalmysh máseleni keńinen zertteýdemiz», - dedi ol.
Densaýlyq saqtaý ministrligi álemdegi búkil klinikalyq zertteýlerdi zerdelep, baǵyp otyratyn arnaiy jumys tobyn qurǵan.
«Álemdegi vaktsinalar boiynsha barlyq nusqa zerttelýde. Alaida, aldyn ala berilgen aqparatqa sáikes, negizgi úmitker retindegi vaktsinalardy zertteýdiń úshinshi satysy alǵashqy toqsanda (2021 jyldyń) aiaqtalady», - dedi ol.
