Qazaqstannyń 10 óńiri «qyzyl» aimaqta tur. Bul týraly QR Densaýlyq saqtaý vitse-ministri – Bas memlekettik sanitar dáriger Erlan Qiiasov aitty, dep habarlaidy "Ult aqparat".
«Búgingi kúni álemde KVI-diń 141 millionnan astam jaǵdaiy tirkelgen. Táýligine 700 myńnan astam jaǵdai tirkelip jatyr. 3 mln-nan astam adam qaitys boldy. Ólim kórsetkishi 2,1 paiyzdy qurap otyr. DDU-nyń alty aimaǵynyń beseýinde aýrýdyń ósý tendentsiiasy baiqalady. 21 sáýirdegi jaǵdai boiynsha Qazaqstan Respýblikasynda COVID-19 oń nátijesimen 294 946 naýqas jáne KVI-diń teris nátijesimen 52 025 jaǵdai tirkeldi. KVI-diń oń nátijesimen aýyrǵan 252 598 naýqas jáne KVI-diń teris nátijesimen aýyrǵan 50 839 naýqas emdeldi», - dedi vitse-ministr Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, epidemiologiialyq jaǵdai matritsasyna sáikes Qazaqstan Respýblikasy 23 kún boiy táýekeldiń joǵary aimaǵynda, iaǵni «qyzyl» aimaqta tur.
«Sondai-aq táýekeli joǵary aimaqta 10 óńir bar. Olar: Nur-Sultan, Almaty jáne Shymkent qalalary, Atyraý, Batys Qazaqstan, Aqmola, Qaraǵandy, Aqtóbe, Mańǵystaý jáne Qyzylorda oblystary. Búgingi kúni táýekeldiń ortasha aimaǵynda 4 óńir, atap aitqanda Jambyl, Shyǵys Qazaqstan, Pavlodar, Almaty oblystary bar. Jasyl aimaqta Túrkistan, Soltústik Qazaqstan jáne Qostanai oblystary ornalasqan», - dedi Erlan Qiiasov.
