Italiianyń Azamattyq qorǵaý ulttyq qyzmetiniń basshysy Andjelo Borrelli elde koronavirýs juqtyrǵandardyń jalpy sany 10 myń adamnan asty dep málimdedi, dep habarlaidy ANSA agenttigi.
Borrelli koronavirýstan kóz jumǵandar sany 631 adamǵa jetken. Bul dúisenbi kúngimen salystyrǵanda 168 adamǵa kóp.
«8 514 adam qazirgi ýaqytta COVID-19 virýsyn juqtyrǵan, 1004 adam saýyǵyp shyqqan», dedi ol.
Borrellidiń aitýynsha, koronavirýs juqtyrǵan 877 patsient jansaqtaý bóliminde jatyr. Qaitys bolǵandardyń 45%-y – 80-89 jas aralyǵyndaǵy adamdar, 32%-y – 70 jas shamasyndaǵy, 14%-y – 90 jastan asqan, 8%-y – 60 jastaǵy, 2%-y – 50-59 jas aralyǵyndaǵy adamdar. Úkimet ótken jyldyń sońynda Qytaidyń Ýhan qalasynda alǵash ret tabylǵan jańa virýstyń taralýyn toqtatý úshin qatań sharalar qabyldady.
Italiia turǵyndaryna qajetsiz saparlardan bas tartýǵa jáne shuǵyl qajettilik bolmasa, múmkindiginshe úilerinen shyqpaýǵa keńes beriledi.
Sondai-aq, Borreli oppozitsiialyq liganyń kóshbasshysy Matteo Salvinidiń «barlyǵyn jabý» týraly úndeýinen keiin sharalardy qataitý múmkindigin joqqa shyǵarmady.
«Meniń oiymsha, bul másele tolyǵymen qarastyrylyp, zerttelýi kerek», - dedi Borrelli baspasóz máslihatynda.
Eske sala keteiik, Italiiada koronavirýstan kóz jumǵan alǵashqy jaǵdai 21 aqpanda tirkelgen bolatyn.
