QR Bas memlekettik sanitar dárigeri Aijan Esmaǵambetova koronavirýs infektsiiasyna test tapsyrýdyń jańa talaptaryn túsindirdi, dep habarlaidy QazAqparat.
«Testileý taktikasy bizde únemi ózgerip otyrady. Testileýge jiberiletin adamdardyń sanyn arttyramyz. Sonymen birge, qalyptasqan jaǵdaiǵa qarai test tapsyrýshylardyń kontingentin de ózgertip otyramyz. 13 sáýirden bastap, naýqastardy der kezinde anyqtaý úshin profilaktikalyq testileý júrgizip kelemiz. Odan bólek, test tapsyratyndardy úsh topqa bóldik. Birinshi topqa naýqastar, onymen jaqyn jáne yqtimal bailanysta bolǵandar, JRVI, pnevmoniiamen aýyrǵandar jáne meditsinalyq qyzmetkerler jatady», - dep túsindirdi bas sanitarlyq dáriger QR Densaýlyq saqtaý miinstrliginiń Feisbýktegi baspasóz máslihatynda.
Onyń aitýynsha, profilaktikalyq testileýden ótýi tiis adamdar ekinshi topqa enedi.
«Profilaktikalyq testileýden kimder ótýi qajettigin anyqtadyq. Bul toptyń talaptary únemi ózgeredi. TJ kezeńinen shyǵarda qalanyń tirshiligin qamtamasyz etetin saladaǵy 60 jastan asqan barlyq mamandardy testileýge jiberetin edik. Al endi profilaktikalyq testileýge shet elderden kelgen azamattar, sosyn meditsinalyq qyzmetkerler jiberiledi», - dedi A. Esmaǵambetova.
Sonymen birge, úshinshi toptaǵy testileý epidemiologiialyq sholý maqsatynda júrgiziledi. Bul topta josparly emdelýge, jedel meditsinalyq járdem úshin aýrýhanaǵa túsetinder, jabyq meditsinalyq-áleýmettik mekemelerge túsetin naýqastar bolady.
«Sonymen birge, jańa Qaýly arqyly óńirlerdegi bas sanitarlyq dárigerlerdiń quzyretin ózgerissiz qaldyrdyq. Olar epidemiologiialyq kórsetkishter boiynsha testileýge jiberiletin adamdardy belgileidi», - dedi Aijan Esmaǵambetova.
