Almaty oblysynda zerthana rastaǵan 8 861 koronavirýs infektsiiasyna qatysty jaǵdai tirkeldi. Indettiń taralýy boiynsha Tekeli men Taldyqorǵan qalalary kósh bastap tur, dep habarlaidy "Ult aqparat".
Resmi derek kózderine súiensek, koronavirýstyń ósý qarqyny sońǵy eki aptada 1,0 % - ǵa deiin jetken. Tekeli men Taldyqorǵan bólek, Qapshaǵai qalasy, Kóksý, Qaratal, Eskeldi, Aqsý, Panfilov aýdandarynda infektsiia juqtyrǵandar sany ósken.
Keshe 71 jaǵdai anyqtaldy. Ótken aptanyń qorytyndysy boiynsha Almaty oblysynda 1 430 adam koronavirýs infektsiiasyna shaldyqqan.
Aita keteiik, óńirde infektsiialyq statsionarlar júktemesiniń ulǵaiýyna bailanysty tósek sany 1 138 - den 1 300-ge deiin artty. Sonymen qatar, koronavirýs infektsiiasyna kúdikti jáne rastalǵan adamdar úshin reanimatsiialyq tósek sany 124-ten 135-ke jetkizilgen. Sondai-aq, Memleket basshysynyń tapsyrmasyna sáikes, 26 reanimatsiialyq bólimshe qajetti jabdyqpen jabdyqtaldy.
Oblysta jaǵdaiy aýyr naýqastar men balalarǵa arnalǵan kópsalaly aýrýhanalar bazasynda 4 ahýaldyq ortalyq qurylǵan. Qajet bolǵan jaǵdaida tósek-oryn sany 5280-ge deiin ulǵaitylady.
«Oblys aýrýhanalarynda jeke qorǵaný quraldary men dáriniń eki ailyq qory bar. Budan basqa, halyqtyń áleýmettik osal toptary úshin jergilikti biýdjet esebinen 92,1 mln teńgege virýsqa qarsy preparattar satyp alyndy», - deidi oblystyq densaýlyq saqtaý basqarmasy basshysynyń orynbasary Arman Janseńgirov.
