«Qazaqstan» teleradiokorporatsiiasy koronavirýspen kúresýdiń joldaryn túsindiretin taǵy bir baǵdarlamany efirge shyǵardy. Korporatsiia quramyndaǵy «Balapan» telearnasynan balalarǵa arnalǵan «Saý bolaiyq!» jańa jobasy kórsetile bastady, dep habarlaidy "Ult aqparat".
Habardyń maqsaty - kishkentai kórermenderge densaýlyqqa qatysty mańyzdy aqparatty oiyn túrinde bere otyryp, salaýatty ómir saltyn nasihattaý. Tutas álem koronavirýspen kúresip jatqanda densaýlyqty kútý birinshi orynǵa shyqty. Joba kishkentai kórermenderge «densaýlyq - zor bailyq» ekenin uǵyndyrýdy maqsat etedi. Karantin rejiminde qaýipsizdik sharalaryn saqtaýdyń mańyzy týraly túsindirip, sportpen dos bolýǵa shaqyrady.
«Maýsym aiynan bastap «Qazaqstan» telearnasynan bes kún boiy tikelei efirde «Teledáriger» jobasy shyǵa bastady. Negizgi maqsat – el turǵyndaryna, ásirese shalǵai aýyl-aimaqtaǵy kórermenge qazirgi kúrdeli ahýalǵa bailanysty kúndelikti meditsinalyq keńes berý. Dárigerler tikelei efir barysynda COVID-19 virýsy men ózge de aýrýlardan saqtaný men aldyn alý sharalary, emdeý tásilderi týraly nusqaýlyq beredi. Alaida bul turǵyda balalardyń da kókeiinde túrli suraqtardyń týyndaityny sózsiz. Úlkender óz aldyna, balalardy indetten qorǵaý - basty másele. Ol ata-analardyń jaýapkershiligimen qatar, kishkentailardyń ózine aýrýdyń qaýpin túsindire otyryp júzege asyrylatyny sózsiz. «Balapan» arnasy osy iske atsalysýdy kózdeidi. Bul joba «Qazaqstan» teleradiokorporatsiiasynyń osy baǵyttaǵy aqparattandyrý sharalarynyń jalǵasy», - delingen teleradiokorporatsiianyń baspasóz qyzmeti taratqan aqparatta.
«Saý bolaiyq!» telejobasy efirge aptasyna úsh ret dúisenbi, sársenbi, juma kúnderi saǵat 12:00-de jáne 19:25-te shyǵady. Baǵdarlamanyń «Kerek derek» aidarynda meditsina salasyna qatysty terminder jeńil tilmen túsindirilse, «Shymyr bol!» aidarynda túrli jattyǵýlar kórsetiledi. «Jatta, este saqta!» bólimi baǵdarlama qorytyndysy retinde suraq-jaýap túrinde ótedi.
Jobanyń ereksheligi, baǵdarlamaǵa ekran aldynda otyrǵan kórermender de atsalysa alady. Ol úshin jattyǵý jasap, arnanyń resmi paraqshasyn belgilep, áleýmettik jelige júkteý qajet. Eń úzdik beinejattyǵý «Shymyr bol!» aidarynda kórsetiledi. Joba «Balapan» arnasynyń efirinen jyl sońyna deiin jalǵasady.
