Frantsiiada barlyq mektep, ýniversitet pen balabaqsha dúisenbi kúni koronavirýsqa bailanysty jabylady.
Bul týraly prezident Emmanýel Makron málim etken, dep habarlaidy QazAqparat The Local France-qa silteme jasap.
Beisenbi kúni keshkisin Frantsiia prezidenti Emmanýel Makron telearna arqyly virýsqa qarsy kúreske baǵyttalǵan jańa sharalardy jariialady. Elde 2 870 adam koronavirýs juqtyrǵany jáne 61 adamnyń osy aýrýdan kóz jumǵany anyqtaldy.
Dúisenbiden bastap barlyq balabaqshalar, mektepter men ýniversitetter jańa buiryq shyqqanǵa deiin jabylady. Sondai-aq, prezident 70-ten asqandardy, densaýlyǵy nasharlardy úide qalyp, jurtpen bailanysty barynsha shekteýge shaqyrdy.
Bilik 15 jáne 22 naýryzǵa josparlanǵan mýnitsipaldyq sailaýdy keiinge qaldyrmaǵanyn habarlady.
Emmanýel Makron kásiporyn qyzmetkerlerin úiden jumys isteýge kóshirýge jáne qozǵalysty barynsha shekteýge shaqyrdy. Sondai-aq, ol qoǵamdyq kóliktiń qalypty rejimde jumys isteitinin aitty.
