Filippin prezidenti Rodrigo Dýterte el astanasy Manila qalasynda karantin merzimin 15 mamyrǵa deiin uzartty. Bul týraly juma kúni onyń ókili Garri Rok málim etti, dep habarlaidy QazAqparat Channel News Asia-ǵa silteme jasap.
Onyń aitýynsha, osyndai sharalar koronavirýs infektsiiasy kóp taraǵan basqa aýdandarda da qoldanylady. Indet juqtyrý qaýpi az aýdandarda karantin sharalary alynady. Osylaisha, kólik qozǵalysy men saýda qai jerde iske qosylatynyn shamalaýǵa da bolady.
Juma kúni prezident Dýterte COVID-19 koronavirýsynyń jańa shtammyna qarsy vaktsina oilap tapqan kez kelgen filippindyq azamatqa 50 million peso (986 000 AQSh dollary) kóleminde syiaqy tóleitinin aitty.
El astanasy Manila – 13 million halqy bar jáne milliondaǵan zańsyz kóship kelýshiler turatyn qala. Sońǵy málimetter boiynsha, qalada indet juqtyrǵandar sany el boiynsha aýrýǵa shaldyqqan 6981 adamnyń úshten bir bóligin quraǵan, 462 ólim oqiǵasy tirkeldi.
Elde koronavirýs juqtyrǵan adamdar sany salystyrmaly túrde kóp bolmaǵanyna qaramastan, Filippin eli Qytai men Italiiadan keiin qatań shekteý sharalary men úidegi karantindi engizgen úshinshi el boldy.
El ishinde koronavirýs anyqtalǵannan beri bes kún ótken soń, 12 naýryzda Filippinde kóshi-qon, sapar, saýda oryndaryna, sondai-aq adamdardyń jinalýyna shekteý engizilgen. Áýe kompaniialary da óz qyzmetin 15 mamyrǵa deiin toqtatady.
