«Eýroodaq migratsiialyq daǵdarys pen «Breksitten» ótti, degenmen mamandar koronavirýs saldary odan da qiynǵa soǵady dep boljap otyr». Bul týraly The Guardian basylym jazady.
Italiianyń burynǵy premer-ministri Enriko Letta Eýroodaqtyń jahandyq pandemiia kesirinen úlken qaýipke tap bolyp otyrǵanyn aitty. Basylymnyń jazýynsha, buǵan eýropeizmniń sońǵy on jylda aitarlyqtai álsiregeni áser etken.
«Qazirgi strategiia boiynsha memleketter «Aldymen Italiia», «Aldymen Germaniia», «Aldymen Belgiia» dep urandatyp ketti. Degenmen jahandyq pandemiia kezinde Eýropaǵa birtutastyq kerek. Áitpese, Eýroodaq qurdymǵa ketedi», - deidi ol.
Eýroodaqtyń burynǵy syrtqy saiasat komissary Natali Tochchi de bul jaǵdai Eýroodaqtyń aqyry bolýy múmkin ekenin boljap otyr.
«Eýropa basynda «meniń múddem mańyzdy» degen reaktsiia tanytty. Keiin keibir memleketter meditsinalyq qurylǵylar eksportyna tyiym salyp, kedendik baqylaý engizgennen keiin, bul Eýropanyń basqa memleketterine qiynǵa soqty. Germaniia, Avstriia, Liýksembýrg eń kóp zardap shekken memleketterdiń azamattaryn emdeý úshin aýrýhanalaryn beretin boldy. Frantsiia men Germaniia Italiiaǵa maska jiberdi. Degenmen memleketter ekonomikaǵa qalai kómektesý kerek degen máselege kelgende áli de ortaq sheshimge kele almai otyr», - dep jazady avtor.
Onyń aitýynsha, burynǵy daǵdarystar memleketter arasyndaǵy ózara senimge selkeý túsirgen. Bul jalpy júiege áser etip, úlken problema týyndaǵan.
«Eýropa koronavirýstyń ekonomikalyq saldary týraly máselege kelgende eki lagerge bólingen. Frantsiia, Italiia, Ispaniia men taǵy birneshe memleket eýroaimaqtyń qaryzyn ortaq qylyp, koronaobligatsiia shyǵarýdy qoldaidy. Al Germaniia, Avstriia men Niderlandy bul ideiany qoldamai otyr. Ótken aptada ótken sammitte bul másele qarjy ministrleriniń quzyryna berildi», - dep jazady basylym.
