Elordanyń Qoǵamdyq densaýlyq saqtaý basqarmasynyń basshysy Sáýle Qisyqova koronavirýs infektsiiasynan qaitys bolǵan naýqas týraly aityp berdi, dep habarlaidy "Ult aqparat".
Onyń aitýynsha, 1950 jyly týǵan turǵyn 11 sáýirde jedel járdem qyzmeti arqyly provizorlyq aýrýhanaǵa aýyr halde túsken.
«Jaǵdaiy aýyr bolǵandyqtan, naýqas jedel túrde reanimatsiiaǵa jatqyzyldy. Týystarynyń aitýynsha, marqum úide 3 kún boiy aýyrǵan, dene qyzýy 38 gradýsqa deiin kóterilgen. Meditsinalyq kómekke júginbei, ózdiginen qyzýdy basatyn dáriler ishken. Entigip, tynys alý qiyndaǵan soń statsionarǵa júgingen», - dedi basqarma basshysy «Habar 24» telearnasyndaǵy brifingte.
Odan bólek, naýqas arteriialyq gipertenziia, qant diabeti, júrek ishemiiasymen aýyrǵan. 2011 jyly oǵan aortakaranarlyq shýnttaý jasalǵan.
«Naýqastan koronavirýstyq infektsiia tabyldy, aýrýdy diagnostikalaý men emdeýdiń klinikalyq hattamasyna sáikes em-dom júrgizildi. Kásibi mamandardyń qatysýymen konsiliým júrgizildi. Biraq, qarqyndy terapiiaǵa qaramastan aǵzalyq jetispeýshilik belgileri kóbeiip, 13 sáýirde saǵat 23:40-ta naýqas kóz jumdy. Júrgizilgen barlyq reanimatsiialyq sharalar kómektespedi. Týystary arasynan jaqyn bailanysta bolǵan adamdar tekserilip, úi jaǵdaiynda karantinge ornalasty», - dedi S. Qisyqova.
Aita keteiik, qazirgi ýaqytta Nur-Sultan qalasy boiynsha 264 adam, Almaty qalasynda – 346 adam, Qaraǵandy oblysynda - 79 adam, Aqmola oblysynda - 73 adam, Atyraý oblysynda - 63 adam, Jambyl oblysynda - 49 adam, Shymkent qalasynda - 39 adam, Shyǵys Qazaqstan oblysynda - 8 adam, Almaty oblysynda - 22 adam, Aqtóbe oblysynda - 11 adam, Soltústik Qazaqstan oblysynda - 26 adam, Pavlodar oblysynda - 10 adam, Mańǵystaý oblysynda - 10 adam, Qyzylorda oblysynda - 119 adam, Batys Qazaqstan oblysynda - 11 adam, Túrkistan oblysynda - 47 adam, Qostanai oblysynda - 3 adam, jalpy 1179 naýqas tirkeldi.
