QR Premer-Ministriniń orynbasary Eraly Toǵjanov Úkimettiń keńeitilgen otyrysynda Prezidentke eldegi epidemiologiialyq ahýal týraly esep berdi, dep habarlaidy QazAqparat.
«Delta shtamynyń elimizde tirkelýine bailanysty Úkimet epidemiologiialyq jaǵdaidy turaqtandyrý boiynsha keshendi aldyn alý sharalaryn qabyldady. Birinshi, densaýlyq saqtaý júiesiniń barlyq resýrstary jumyldyryldy. Materialdyq-tehnikalyq jabdyqtar, dári-dármektiń eki ailyq qory, kadrlyq rezerv daiyndaldy.
Ekinshi, qalyptasqan epidahýalǵa bailanysty barlyq óńirlerde karantindik sharalar qatańdatyldy. Úshinshiden, búginde jalpy 32 myń infektsiialyq tósek-oryn bar, onyń 37 paiyzy qoldanysta. Degenmen eń kúrdeli jaǵdai Nur-Sultanda, keshe qalada qosymsha tósek-oryndar ashyldy. Qabyldanǵan sharalarǵa qaramastan munda infektsiialyq oryndardyń 62 paiyzy, reanimatsiialyq oryndardyń 85 paiyzy naýqastarmen tolyp otyr. Onyń sebebi – elordada sońy aida naýqastaný sany tórt esege artyp otyr», - dedi Eraly Toǵjanov.
Onyń aitýynsha, jalpy barlyq óńirlerde, onyń ishinde Almaty, Shymkent qalalarynda, Qaraǵandy, Mańǵystaý, Aqtóbe, Batys Qazaqstan oblystaryndaǵy jaǵdai qatań baqylaýda. Epidemiologiialyq ahýal ýshyǵa túsken jaǵdaida qosymsha 50 myń tósek-oryn qory daiyn.
Óz kezeginde elorda ákimi Altai Kólginov shynynda da Delta shtamynyń elge kelýimen epidahýal qiyndaǵanyn, oń nátijesi bar PTR taldaýlary kóbeigenin atap ótti.
«Osyǵan bailanysty Vedomstvoaralyq komissiia otyrysynda karantindik shekteýler boiynsha qosymsha sharalar qabyldandy. Máselen, demalys kúnderi qoǵamdyq kólik toqtatyldy, qoǵamdyq tamaqtaný ýaqyty qysqartyldy, kinoteatr sekildi oiyn-saýyq mekemeleri ýaqytsha jabyldy. Osy aptada statsionarǵa júkteme kóp bolǵandyqtan qosymsha 900-den astam oryn ashtyq. Búgingi kórsetkish boiynsha, tósek-orynnyń 62 paiyzynda naýqastar jatyr. Rezervte áli de oryn jetkilikti.
Vaktsinalaý boiynsha jumystardy kúsheittik. Eki apta buryn táýligine 1300-1500 vaktsina egilse, qazir kún saiyn 6500-7000 vaktsina salynady. Jalpy vaktsinalaý josparynyń 43 paiyzy oryndaldy. Pedagogtardyń 85 paiyzy, kommýnaldyq qyzmetkerlerdiń 88 paiyzy egildi. Túsindirý jumystary júrip jatyr. Barlyq jaǵdai baqylaýda», - dep túsindirdi Altai Kólginov.
