قر پرەمەر-مينيسترٸنٸڭ ورىنباسارى ەرالى توعجانوۆ ٷكٸمەتتٸڭ كەڭەيتٸلگەن وتىرىسىندا پرەزيدەنتكە ەلدەگٸ ەپيدەميولوگييالىق احۋال تۋرالى ەسەپ بەردٸ, دەپ حابارلايدى قازاقپارات.
«دەلتا شتامىنىڭ ەلٸمٸزدە تٸركەلۋٸنە بايلانىستى ٷكٸمەت ەپيدەميولوگييالىق جاعدايدى تۇراقتاندىرۋ بويىنشا كەشەندٸ الدىن الۋ شارالارىن قابىلدادى. بٸرٸنشٸ, دەنساۋلىق ساقتاۋ جٷيەسٸنٸڭ بارلىق رەسۋرستارى جۇمىلدىرىلدى. ماتەريالدىق-تەحنيكالىق جابدىقتار, دەرٸ-دەرمەكتٸڭ ەكٸ ايلىق قورى, كادرلىق رەزەرۆ دايىندالدى.
ەكٸنشٸ, قالىپتاسقان ەپيداحۋالعا بايلانىستى بارلىق ٶڭٸرلەردە كارانتيندٸك شارالار قاتاڭداتىلدى. ٷشٸنشٸدەن, بٷگٸندە جالپى 32 مىڭ ينفەكتسييالىق تٶسەك-ورىن بار, ونىڭ 37 پايىزى قولدانىستا. دەگەنمەن ەڭ كٷردەلٸ جاعداي نۇر-سۇلتاندا, كەشە قالادا قوسىمشا تٶسەك-ورىندار اشىلدى. قابىلدانعان شارالارعا قاراماستان مۇندا ينفەكتسييالىق ورىنداردىڭ 62 پايىزى, رەانيماتسييالىق ورىنداردىڭ 85 پايىزى ناۋقاستارمەن تولىپ وتىر. ونىڭ سەبەبٸ – ەلوردادا سوڭى ايدا ناۋقاستانۋ سانى تٶرت ەسەگە ارتىپ وتىر», - دەدٸ ەرالى توعجانوۆ.
ونىڭ ايتۋىنشا, جالپى بارلىق ٶڭٸرلەردە, ونىڭ ٸشٸندە الماتى, شىمكەنت قالالارىندا, قاراعاندى, ماڭعىستاۋ, اقتٶبە, باتىس قازاقستان وبلىستارىنداعى جاعداي قاتاڭ باقىلاۋدا. ەپيدەميولوگييالىق احۋال ۋشىعا تٷسكەن جاعدايدا قوسىمشا 50 مىڭ تٶسەك-ورىن قورى دايىن.
ٶز كەزەگٸندە ەلوردا ەكٸمٸ التاي كٶلگٸنوۆ شىنىندا دا دەلتا شتامىنىڭ ەلگە كەلۋٸمەن ەپيداحۋال قيىنداعانىن, وڭ نەتيجەسٸ بار پتر تالداۋلارى كٶبەيگەنٸن اتاپ ٶتتٸ.
«وسىعان بايلانىستى ۆەدومستۆوارالىق كوميسسييا وتىرىسىندا كارانتيندٸك شەكتەۋلەر بويىنشا قوسىمشا شارالار قابىلداندى. مەسەلەن, دەمالىس كٷندەرٸ قوعامدىق كٶلٸك توقتاتىلدى, قوعامدىق تاماقتانۋ ۋاقىتى قىسقارتىلدى, كينوتەاتر سەكٸلدٸ ويىن-ساۋىق مەكەمەلەرٸ ۋاقىتشا جابىلدى. وسى اپتادا ستاتسيونارعا جٷكتەمە كٶپ بولعاندىقتان قوسىمشا 900-دەن استام ورىن اشتىق. بٷگٸنگٸ كٶرسەتكٸش بويىنشا, تٶسەك-ورىننىڭ 62 پايىزىندا ناۋقاستار جاتىر. رەزەرۆتە ەلٸ دە ورىن جەتكٸلٸكتٸ.
ۆاكتسينالاۋ بويىنشا جۇمىستاردى كٷشەيتتٸك. ەكٸ اپتا بۇرىن تەۋلٸگٸنە 1300-1500 ۆاكتسينا ەگٸلسە, قازٸر كٷن سايىن 6500-7000 ۆاكتسينا سالىنادى. جالپى ۆاكتسينالاۋ جوسپارىنىڭ 43 پايىزى ورىندالدى. پەداگوگتاردىڭ 85 پايىزى, كوممۋنالدىق قىزمەتكەرلەردٸڭ 88 پايىزى ەگٸلدٸ. تٷسٸندٸرۋ جۇمىستارى جٷرٸپ جاتىر. بارلىق جاعداي باقىلاۋدا», - دەپ تٷسٸندٸردٸ التاي كٶلگٸنوۆ.
