Álemde koronavirýs pandemiiasy saldarynan qaitys bolǵan adamdardyń sany 2 millionnan asty. Ulybritaniiaǵa kirý úshin PTR-anyqtama qajet. Al Germaniiada N95 standartyndaǵy respiratorlyq maska kiiý mindettelmek. Koronavirýsqa qatysty osy jáne ózge de jańalyqtar jóninde VVS agenttigi habarlady.
Djons Hopkins Ýniversitetiniń málimeti boiynsha, pandemiia bastalǵannan beri álemde virýsqa shaldyqqandar sany 93,3 millionnan asty, 2 millionnan astam adam qaitys boldy. Birqatar elde, atap aitqanda Eýropada kúndelikti ólim-jitim 1 myńnana joǵary bolyp otyr.
Indettiń kúrt ósýi saldarynan Braziliianyń Amazonas shtatynyń astanasy Manaýs aýrýhanalarynda ottegi qory taýsyldy. Bólimshelerde bos tósekter, ókpeni jasandy jeldetý apparattary men ottegi maskalary da qalmaǵan. Dárigerler aýrýhanalarǵa jetkizilip jatqan jańa patsientterge kómektese almaityndaryn málimdedi.
Braziliia koronavirýs juqtyrǵandardyń sany boiynsha álemde – úshinshi orynda (8,3 million), qaitys bolǵandar kórsetkishimen ekinshi orynda (207 myń) tur.
Ulybritaniia elge kirýge tyiym salady
Ulybritaniia premer-ministri Boris Djonson 18 qańtar kúngi saǵat 04:00-den bastap álemniń barlyq elderinen erkin kirý toqtatylatynyn málimdedi. Bul shekteý karantinge qaramastan erkin qatynaý kelisimi jasalǵan memleketterge de qatysty bolyp otyr.
Iaǵni endigide Ulybritaniiaǵa keletinderdiń barlyǵy elge ushyp-shyqpas buryn koronavirýsqa test tapsyrýy qajet. Sondai-aq Ulybritaniia aýmaǵyna kelgennen keiin 10 kún oqshaýlanýda bolady nemese 5 kúndik oqshaýlaýdan soń qaita test tapsyrýlary tiis. Jańa shekteýler 15 aqpanǵa deiin kúshinde bolady.
Buǵan deiin Ulybritaniia jáne basqa da birqatar elder Ońtústik Amerika, Portýgaliia jáne Kabo-Verde elderinen keletin jolaýshylarǵa ýaqytsha tyiym salǵan bolatyn. Bul sheshim osy aptada japon ǵalymdarynyń koronavirýstyń jańa, «braziliialyq túrin» ashýymen bailanysty qabyldandy.
Indettiń «braziliialyq túrin» japon ǵalymdary Japoniiaǵa kelgenderdiń barlyǵyn kúndelikti tekserý kezinde Braziliiadan saparlaǵan tórt týristiń analizinen tapqan.
Onymen bir mezgilde Ulybritaniiada ózin-ózi oqshaýlaý sharalary nátije bere bastaǵany týraly alǵashqy málimetter paida boldy: sońǵy kúnderi jańa jaǵdailardyń sany tómendep, R kóbeiý koeffitsienti elde ortasha eseppen 1,2-1,3-ke deiin tómendegen.
Londonda ýaqytsha máiithana jumys istei bastady
Londonnyń soltústik-batysynda juma kúni ýaqytsha máiithana jumys istei bastady. Ol birtindep keńeiip, 20 qańtarǵa deiin 1300 múrdeni qabyldai alatyn bolady. Ulybritaniia astanasynyń meri Sadik Hanniń málimetinshe, Ulybritaniia astanasynda pandemiia qurbandarynyń sany 10 myńnan asty.
Aita ketsek, Londonda pandemiianyń alǵashqy tolqyny kezinde ýaqytsha tórt máiithana ashylǵan edi. Biraq ol kezde máiithanalardyń qajeti bolmady.
Bir apta ishinde salynǵan máiithana tońazytqysh qondyrǵylary bar shatyrlardan turady. Osyndai ýaqytsha nysandar basqa da aǵylshyn qalalarynda boi kótermek.
Eýropa: tyiym ústine tyiym
Germaniiada Covid-19 juqtyrǵandardyń sany 2 millionnan asty, sońǵy 24 saǵatta taǵy 1113 adam qaitys boldy. Germaniia kantsleri Angela Merkel 16 federaldy jerdiń basshylarymen kovid-sammit ótkizip, qazirdiń ózinde qatań lokdaýndy odan saiyn kúsheitýdi usynbaq.
Dúisenbiden bastap Bavariia meditsinalyq maskalarǵa jańa talaptar qoiady: ádettegi birrettik maskalar tiimsiz dep tanyldy jáne úi-jailarda FFP2 standartyna sáikes keletin respiratorlar kiiý mindetteldi (bul maskalar N95 dep te atalady). Mundai talap jaqyn ýaqytta eldiń barlyq aýmaǵynda engiziletini kútilýde.
Portýgaliiada ulttyq lokdaýn jariialandy, ol joq degende 30 qańtarǵa deiin sozylady. Mektepter, azyq-túlik dúkenderi, veterinarlyq klinikalar, naýbaihanalar, gúl dúkenderi men qonaq úiler ashyq bolady. Sondai-aq azamattardan esh sebepsiz úiden shyqpaýǵa keńes berildi.
Vengriia Qytaidyń CoronaVac vaktsinasyn maquldaǵan alǵashqy eýropalyq el bolýy múmkin. Premer-ministr Viktor Orban dál osy vaktsinany qoldanýdy usynyp otyr jáne eldiń farmatsevtikalyq retteýshilerin sheshimdi tezirek qabyldaýǵa shaqyrýda.
Avstriiadaǵy Kittsbiýel taý shańǵysy kýrortynda COVID-19 indeti kúrt tarady. Jergilikti basshylyqtyń pikirinshe, oǵan sebep Ulybritaniiadan kelgen nusqaýshylar boldy. Endi kýrort óz biýdjetinen búkil okrýgke koronavirýs synaǵynan ótýdi usynýda. Kittsbiýelde áigili «Shtraif» tasjolynda taý shańǵysy boiynsha álem kýbogy kezeńderiniń biri ótip jatqan bolatyn. Alaida aýrýdyń órshýine bailanysty ony Avstriianyń basqa aimaǵyna aýystyrýǵa týra keldi.
Ispaniiada rojdestvolyq merekelerden keiin indettiń kúrt óskenin aitylýda. Qazirgi tańda eldegi aýrýhanalarda COVID-19 diagnozy qoiylǵan 19 myń patsient bar, olardyń kópshiligi qańtar aiynyń basynda túsken.
EO-nyń kóptegen elderi Pfizer vaktsinasyn ýáde etilgen kólemde almady, óitkeni amerikalyq kompaniia jetkizilimderdi keshiktirip jatyr. Shvetsiia, Daniia, Finliandiia, Litva, Latviia jáne Estoniia bul jaǵdaidy aqylǵa qonymsyz dep atady jáne onyń vaktsinatsiia protsesine senimdi tómendetetinin málimdedi.
Qytaida naýqas sany kóbeidi
Qytaida ótken jyldyń 1 naýryzynan bergi eń joǵary táýliktik kórsetkish tirkeldi – 144 jaǵdai (naýryzda 202 bolǵan). Basqa elderdiń statistikasymen salystyrǵanda bul kórsetkish az bolyp kórinedi, alaida Qytai biligi ony dabyl retinde qarastyryp otyr. Naýqastardyń kópshiligi 22 million halqy bar Hebei provintsiiasynda turady. Osy provintsiiada shuǵyl túrde 3 myń oryndyq aýrýhana-izoliatordyń qurylysy bastaldy.
Baiden Amerikaǵa qol ushyn sozbaq: bailar kóbirek tóleidi
20 qańtar kúni AQSh prezidenti laýazymyna resmi kirisetin Djo Baiden elge qyzmetin 1,9 trln dollarlyq kómek paketin usynýdan bastaǵysy keledi. Bul soma ár amerikalyqqa 1400 dollardy quraityn birjolǵy tólemderdi, jumyssyzdyq boiynsha járdemaqylardy jáne basqa da áleýmettik tólemderdi arttyrýdy qarastyrady. 400 mlrd dollary vaktsinatsiia naýqany men indetke qarsy basqa da sharalardy uiymdastyrýǵa jumsalady.
