Batys Qazaqstan oblysynda koronavirýs juqtyrǵan sońǵy anyqtalǵan tórt naýqastyń úsheýi Reseiden kelgen, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brifingte málim etkenindei, bulardyń ekeýi – Qyzylorda, bireýi – Batys Qazaqstan oblysynyń turǵyny.
Úsheýi de Samara oblysymen shektesetin «Syrym» beketinen ótkennen keiin karantindik statsionarǵa jatqyzylyp, zerthanalyq synama alynǵan kezde koronavirýs anyqtalǵan.
Taǵy bir adam – oblys turǵyny. Ol buryn koronavirýs juqtyrǵan azamatpen qarym-qatynasta bolǵandyqtan, karantindik statsionarǵa jatqyzylǵan. Sodan keiin onyń da dertke shaldyqqany belgili boldy.
Qazirgi kezde bári de oblystyq juqpaly aýrýlar aýrýhanasynda tiisti emderin alýda.
Aýrý oshaqtarynda dezinfektsiialyq jumystar júrgizildi.
Osylaisha BQO-da aýyrǵandar sany 68-ge jetip, sonyń ekeýi jazylyp shyqty.
«Áleýmettik jelilerde turǵyndar Reseiden kelgenderdi shekaradan nege ótkizedi? degen saýaldy jii qoiyp jatady. Buǵan aitarymyz, Reseiden kelip jatqandardyń barlyǵy – Qazaqstan azamattary, kópshiligi – oblys turǵyndary. Keibireýleri jumyspen, bireýleri densaýlyǵyna bailanysty em alýǵa jáne basqa jeke sebeppen baryp, qaityp jatqandar. Olar shekaradan ótken boida karantindik statsionarǵa jatqyzylyp, bárinen synama alynady. Koronavirýs juqtyrǵandar sol boida oblystyq juqpaly aýrýlar aýrýhanasyna jetkiziledi. Aýyrmaǵandaryna qolhat berilip, úilerine jiberiledi. Bular 14 kún boiy meditsinalyq baqylaýda bolady. Qazirgidei tótenshe jaǵdai kezinde turǵyndardyń úilerinen shyqpai, barlyq qaýipsizdik sharalaryn saqtaýy asa mańyzdy», dedi N.Mustaev.
