Batys Qazaqstan oblysynda 1092 adam úiden baqylanýda, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aitýynsha, sondai-aq 100 adam statsionarlyq karantinde jatyr.
Sonyń ishinde oblystyq juqpaly aýrýlar aýrýhanasynda em alyp jatqan eki naýqastyń jaǵdaiy qanaǵattanarlyq.
«Kýmyska» provizorlyq gospitalynda 57, Báiterek aýdanynda 13 jáne «Ivýshka» karantindik statsionarynda 28 adam bar. Báriniń de jaǵdaiy qanaǵattanarlyq. Kún saiyn meditsinalyq baqylaý júrgizilýde.
«Qazir oblys ortalyǵynda emdelip jatqan naýqas áieldiń 24 naýryz kúni Oraldan Aqsaiǵa Ford Transit avtokóligimen barǵandyǵy belgili boldy. Onymen birge bolǵan júrgizýshi men úsh jolaýshy anyqtaldy. Qalǵandary izdestirilý ústinde», dedi Nurlybek Mustaev.
BQO TJ departamenti bastyǵynyń orynbasary Aqylbek Ahmetjanovtyń sózine qaraǵanda, qazirgi tańda alańdar men kóshelerdi, bilbord, avtobýs aialdamalaryn dezinfektsiialaý jumystary júrgizilýde. Buǵan departamentten 132 adam, 36 tehnika jumyldyrylǵan. Olar sý ótkizbeitin kombinezondarmen, aspaly órt sóndirý quraldarymen qamtamasyz etilgen.
«30 naýryz kúni Samaradan 57 stýdent kelgen bolatyn. Olardyń qaida ekendigin únemi baqylap turý úshin telefondaryna mobildik qosymsha ornatyldy», dedi A.Ahmetjanov.
N.Mustaev stýdentterdiń bir kún karantindik baqylaýda bolǵannan keiin úilerine jiberilgenin jetkizdi.
Eske sala keteiik, budan buryn Oralda koronavirýspen kúres sharalaryna 94 mln teńge bólingenin jazǵan bolatynbyz.
