Soltústik Qazaqstan oblysynda koronavirýs infektsiiasyn juqtyrý deńgeii turaqtaldy, mamandar muny der kezinde qolǵa alynǵan is-sharalarmen bailanystyrady, dep habarlaidy QazAqparat.
SQO-nyń bas sanitariialyq dárigeri Arman Kúshbasovtyń pikirinshe, oblys ortalyǵyn karantinge jabý óz nátijesin berip jatyr. Sońǵy kúndermen salystyrǵanda koronavirýs boiynsha jaǵdai turaqtanyp qana qoimai, 5,7% tómendetý múmkin bolǵan.
«Aýyrǵandardyń basym bóligi – Petropavldan. Osyǵan orai 9 qarashadan bastap oblys ortalyǵy men oǵan shekaralas jatqan Qyzyljar aýdanyn blok-posttar qoiyp, karantinge japtyq. Senbi-jeksenbi jáne mereke kúnderine lokdaýn rejimi engizilgen. Budan basqa kei nysandardyń jumysyn shektedik. Bul – óz nátijesin berdi. Osyǵan deiin oblystaǵy barlyq aýyrǵandardyń jartysynan astamy Petropavlda anyqtalsa, qazir ony 40% deiin tómendettik», - deidi Arman Kúshbasov.
Mamannyń aitýynsha, KVI-men aýyrǵan 1 adamnyń ózgelerdi juqtyrý deńgeii 20% tómendegen.
«Koronavirýspen aýyrǵan bir syrqat ortasha 3-4 adamǵa juqtyrady. Qazan aiynda aýyrǵandarmen bailanysta bolyp, KVI anyqtalǵandardyń úlesi 13% qurasa, tek sońǵy aptada bul kórsetkish 50% qurady. Olarda negizinen aýrýdyń belgileri joq», - deidi oblystyń bas sanitariialyq dárigeri.
Arman Kúshbasovtyń aitýynsha, Petropavlda ázirge, karantindik shekteýler jeńildetilmeidi. Iaǵni senbi-jeksenbi jáne mereke kúnderi qoǵamdyq kólikter burynǵysynsha jumys istemeidi.
