Batys Qazaqstan oblysynda koronavirýs juqtyrǵandar sany 103-ke jetti, dep habarlaidy "Ult aqparat".
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brifingte málim etkenindei, sonyń basym kópshiligi – Reseiden kelgender.
101 adam oblystyq juqpaly aýrýlar aýrýhanasynda em alyp jatsa, ekeýi jazylyp shyqty.
«Kúni búgin oblysta 24 adam provizorlyq, 110 adam karantindik statsionarda jatyr. Oǵan qosa 1386 adam úide oqshaýlanǵan, olar da kúndelikti meditsinalyq baqylaýǵa alynǵan», dedi N.Mustaev.
Sonymen qatar N.Mustaev karantindik shekteý sharalarynyń jalǵasatynyn jetkizdi. Atap aitqanda, BQO bas memlekettik sanitarynyń qaýlysyna engizilgen ózgeristerge sáikes budan buryn Oralda qoǵamdyq kólikter qozǵalysy toqtatylǵan edi. Bul shara endi 28 sáýirge deiin uzartylady.
Sol sekildi sanitarlyq-epidemiologiialyq talaptardy saqtap, qyzmet atqaratyn kóterme saýda oryndarynan basqa óńirdegi azyq-túlik bazarlary da 28 sáýirge deiin jabyq turady. Bankter boiynsha da jaǵdai osyndai. Tek zeinetaqy, járdemaqy, ataýly áleýmettik kómek beretin bankter ǵana saǵat 09.00-den 16.00-ge deiin qyzmet kórsetedi.
Eske sala keteiik, budan buryn BQO-da sońǵy tirkelgen 6 naýqastyń beseýi Reseiden kelgenin, oblysta 133 myń turǵynǵa 42500 teńgeden berilgenin jazǵan bolatynbyz.
