Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qisyqova koronavirýs juqtyrǵan naýqastardy emdeý qaǵidalary jóninde aityp berdi, dep habarlaidy QazAqparat.
«Bul statsionar qalanyń syrtynda, bólek ǵimaratta ashylǵan. Sondyqtan, ózge nozologiialyq formadaǵy naýqastar bólek statsionarda qaralady. Medqyzmetkerler qaýipsizdik sharalaryn saqtaý boiynsha arnaiy oqytýdan ótken», - dedi basqarma basshysy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, aýrýdyń basty belgileri - joǵary temperatýra men jótel baiqalsa, úide otyrǵan jón.
«Mundai belgilermen meditsinalyq mekemelerge barmaýlaryńyzdy suraimyz. Onyń ornyna koll-ortalyqqa nemese jedel járdem qyzmetine habarlasyp, keńes alyńyz. Koreiada jańa infektsiiany juqtyrǵan naýqastar emhanaǵa kelip, tutas klinikalardy qyzmetkerlerimen, kezek kútken adamdarmen birge karantinge japqan oqiǵalar boldy. Bul tájiribe bizdiń de meditsinalyq uiymdarda qoldanylady. Sondyqtan, bizdiń keńesterdi qatań ustanýdy suraimyz», - dedi S. Qisyqova.
Buǵan deiin QR Densaýlyq saqtaý ministri Eljan Birtanov elordada koronavirýs juqtyrǵan úshinshi adamnyń anyqtalǵanyn habarlady. Qazaqstandyq áiel 12 naýryz kúni Milan-Máskeý-Nur-Sultan reisinen túsirilip, Nur-Sultan qalasyndaǵy kópbeiindi meditsinalyq ortalyqtyń karantindik statsionaryna jatqyzylǵan.
Sondai-aq, naýqaspen bir ushaqta bolǵan 20 jolaýshy aýrýhanaǵa jatqyzyldy.
