Almaty ákimi Baqytjan Saǵyntaev COVID-19 gospitalderine ainalǵan nysandardyń daiyndyǵyn tekserdi, dep habarlaidy "Ult aqparat".
«Búgin №4 qalalyq perzenthananyń jańa korpýsyn qarap shyqtym. Munda COVID-19-ben aýyrǵandar úshin qosymsha 50 tósek-oryn ashylady. Koronavirýs infektsiiasyn juqtyrǵan júkti áielderge arnalǵan gospitaldy daiyndaý boiynsha qurylys-jóndeý jumystary aiaqtaldy. Qazir hirýrgiialyq, reanimatsiialyq jabdyqtardy, ókpeni jasandy jeldetý apparattaryn qosý jumystary júrgizilýde. Sóitip aptanyń sońyna qarai bul jer KVI-men bosanatyn áielderdi qabyldaýǵa daiyn bolady.
Osylaisha kovidti statsionar retinde jumys isteitin perzenthananyń qýaty 105 tósek-orynǵa jetkiziledi. Ýaqytyly kórsetilgen joǵary bilikti meditsinalyq kómektiń arqasynda analar men jańa týǵan nárestelerdiń densaýlyǵy men ómirine qaýip tómendeidi», - dedi Almaty ákimi jelidegi paraqshasynda.
Sonymen qatar, Almaty ákimi arnaiy meditsinalyq áleýmettik qyzmetter ortalyǵynyń qurylysymen de tanysty. Bul ǵimarat COVID-19-ǵa qarsy kúres aiasynda oryn qoryn turaqtandyrý maqsatynda birinshi eshelondaǵy infektsiialyq statsionar bolmaq. Munda 500 adam emdeletin bolady.
Ákimniń aitýynsha, ǵimarat 1 aidan soń paidalanýǵa beriledi.
Aita ketý kerek, Almatyda barlyq densaýlyq saqtaý nysandary sanitarlyq-epidemiologiialyq talaptardy saqtai otyra koronavirýs gospitalderine aýysyp jatyr.
