Almatyda epidemiologiialyq jaǵdai turaqtaldy. Bul týraly Almaty qalasy ákimdiginiń baspasóz ortalyǵynda ótken onlain-brifingte Almaty qalasy qoǵamdyq densaýlyq basqarma basshysy Kamaljan Nadyrov málim etti, dep habarlaidy QazAqparat.
«Búgingi kúni qaladaǵy KVI jaǵdaiy turaqtaldy, sońǵy aida aýrýshańdyqtyń ortasha ósimi shamamen 2,3%-ǵa, sońǵy aptada ósim 1,1 paiyzdy qurady. Qazirgi ýaqytta Almaty qalasynda tirkelgen KVI jaǵdailarynyń sany – 2882, onyń ishinde 1875 adam saýyǵyp, emdeýden shyǵaryldy, bul tirkelgenderdiń jalpy sanynyń 65%-yn quraidy, tek ótken aptada 323 adam emdeýden shyǵaryldy. Ókinishke orai, ólim-jitim jaǵdailary da boldy – 10 adam KVI-den qaitys boldy, osylaisha qazirgi ýaqytta 975 patsient emin jalǵastyrýda. Meditsinalyq uiymdar shtattyq rejimde bekitilgen emdeýge jatqyzý algoritmine sáikes jumys isteýde» – dedi Qamaljan Nadyrov.
Onyń aitýynsha, qazir qoǵamdyq densaýlyq basqarmasynyń negizgi kúsh-jigeri meditsina qyzmetkerleriniń qaýipsiz eńbek jaǵdailaryn qamtamasyz etýge jáne meditsinalyq kómek alý kezinde patsientterdiń qaýipsiz bolýyna baǵyttalǵan. Meditsina qyzmetkerleri barlyq qajetti jeke qorǵaný quraldarymen qamtamasyz etilgen. Budan basqa, aýrýdyń múmkin bolatyn jańa tolqynyna – kúzgi kezeńine daiyndyq jumystary júrgizilýde.
«KVI-men kúres aiasyndaǵy jumystan basqa, basqarma strategiialyq mindetterdi iske asyrý boiynsha jumys atqarýda. Qala ákimi meditsinalyq kómektiń sapasy men qoljetimdiligin arttyrý boiynsha birqatar naqty mindetter qoidy. Osyǵan bailanysty, basqarma 2025 jylǵa deiin qalanyń densaýlyq saqtaý júiesin damytýdyń keshendi josparyn ázirledi. Jaqyn arada atalǵan jospar saraptamalyq qaýymdastyqpen talqylanatyn bolady. Bul josparda aldaǵy qalanyń densaýlyq saqtaý júiesin damytýdyń 5 jylǵa arnalǵan naqty baǵyty aiqyndalatyn bolady. Atap aitqanda, qalanyń kadrlyq áleýetin taldaý jáne odan ári damytý, biliktilikti arttyrý, jańa tehnologiialardy engizý máseleleri boiynsha jumystar júrgiziletin bolady», – dep qortyndylady ol.
