Sarapshylar COVID-19 koronavirýsynyń taralýy saldarynan búkil álemdegi kólik salasyna aitarlyqtai shyǵyn keltiretinin aitýda, dep habarlaidy QazAqparat tilshisi.
Ótken aptada Iskerlik saiahat jahandyq qaýymdastyǵy koronavirýstyń «biznes saparlardyń búkil álemdik indýstriiasyna qaýip tóndirip otyrǵanyn», bul sektor aiyna 46,6 mlrd dollar shyǵynǵa ushyraitynyn boljaǵan. Eger jaǵdai túzelmese, shyǵyndar 2020 jylǵa jalpy boljanǵan shyǵyndardyń 37 paiyzyn quraýy múmkin.
Iskerlik týrizmmen ainalysatyn 400 kompaniiadan suraý júrgizý barysynda firmalardyń shamamen úshten eki bóligi kem degende birneshe kezdesý nemese sharalardy ótkizbei qoiǵany anyqtaldy, al 55-i óz tabystarynyń aitarlyqtai azaiǵany týraly habarlaǵan.
Kompaniialar tek Qytai eline emes, sonymen qatar Japoniia, Ońtústik Koreia, tipti Eýropaǵa saparlaýdy toqtatty. Amazon, Google jáne Apple siiaqty iri kompaniialar saparlaýǵa shekteý qoiǵanyn jariialap, Aziiadaǵy keibir keńselerin jaýyp tastady.
Óz kezeginde, Halyqaralyq áýe kóligi qaýymdastyǵy (IATA) áýe kompaniialarynyń shyǵyndary Aziia-Tynyq muhity aimaǵynda jolaýshylar sanynyń azaiýy saldarynan 29 milliard dollardy quraitynyn boljap otyr.
Virýstyń taralýy teńizdegi jolaýshylar tasymalyna da áserin tigizgen. Sońǵy aptalarda kriýizdik lainerlerde aýrý tarap jatqany, ondaǵy karantinder týraly kóp aqparat taratyldy.
Halyqaralyq krýizdik jeliler qaýymdastyǵy krýizdik lainerlerge ie kompaniialardyń Qytai nemese Ońtústik Koreiada bolǵan, nemese virýsty juqtyrǵandarmen bailanysta bolǵan adamdardy óz kemelerine otyrǵyzbaýy tiis ekenin habarlady.
COVID-19 virýsy kólik ielerine de keri áserin tigizgen. S&P Global Ratings reiting júrgizý agenttigi kólikterdiń álemdik satylýy 3,6 paiyzǵa túsetinin boljaǵan. Buǵan negizinen Qytai elinde kólikterge suranystyń 5 paiyzǵa tómendeitini týraly boljam sebep bolyp otyr.
