Qazaqstanda 50 adam jasandy tynys alý apparatynda jatyr. Bul týraly QR Densaýlyq saqtaý ministrliginiń resmi ókili Baǵdat Qojahmetov aitty, dep habarlaidy "Ult aqparat".
«Densaýlyq saqtaý ministrliginiń media ortalyǵyna túsken resmi statistikaǵa sáikes, Qazaqstanda osy jyldyń 13 naýryzynan bastap búgingi kúnge deiin koronavirýs infektsiiasymen 104 713 adam aýyrdy. Jazylyp shyqqan naýqastardyń sany 92 598-ge jetti nemese jalpy kórsetkish 88,4 paiyzdy qurady. Ókinishke qarai, 1 523 adam qaitys boldy», - dedi ol Ortalyq kommýnikatsiialar qyzmetindegi brifing barysynda.
Onyń aitýynsha,10 597 adam em qabyldaýyn jalǵastyryp jatyr. Onyń ishinde 52 bala bar. 5 673 adam statsionarlyq, 4 924 adam ambýlatorlyq jaǵdaida emdelýde.
«Emdelip jatqan naýqastardyń 3,6 paiyzynyń nemese 379 adamnyń densaýlyǵy aýyr jáne óte aýyr dep baǵalanyp otyr. Atap aitqanda, 309 adamnyń jaǵdaiy aýyr jáne 70 adamnyń densaýlyǵy óte nashar. 50 naýqas jasandy tynys alý apparatyna qosylǵan», - dedi Baǵdat Qojahmetov.
