Búgin QR Premer-Ministriniń orynbasary Eraly Toǵjanovtyń tóraǵalyǵymen Qazaqstan aýmaǵynda koronavirýstyq infektsiianyń paida bolýy men taralýyna jol bermeý jónindegi vedomstvoaralyq komissiianyń osy jylǵy qorytyndy otyrysy ótti, dep habarlaidy QazAqparat.
QR DSM Sanitarlyq-epidemiologiialyq baqylaý komitetiniń resmi ókili Erjan Baitanaevtyń Facebook paraqshasyndaǵy jazbaǵa qaraǵanda otyrysy barysynda elimizdiń Densaýlyq saqtaý birinshi vitse-ministri Marat Shoranov baiandama jasap, respýblikadaǵy epidemiologiialyq ahýal jaiynda esep bergen.
«Otyrys barysynda eldegi epidemiologiialyq ahýaldyń turaqty ekendigi atalyp ótildi. Biraq, «omikron» shtamy qazirdiń ózinde álemniń 110 elinde anyqtalyp otyr. DDSU málimetine qaraǵanda onyń taralýy «delta» nusqasynan 5 ese joǵary. Sondyqtan Densaýlyq saqtaý ministrliginiń qosymsha is-sharalar qabyldaý týraly usynysy maquldandy. Atap aitqanda, 5 qańtardan bastap saýda oiyn-saýyq ortalyqtaryna, saýda úileri men karaokelerge «jasyl» mártebesi bar adamdardyń ǵana kirýine ruqsat beriledi», - dedi ol.
Onyń atap ótýinshe, elimizdiń aýmaǵynda «omikron» shtamy anyqtalǵan jáne epidemiologiialyq ahýal nasharlaǵan jaǵdaida mundai shekteýler bankter, Qazposhta bólimsheleri syndy basqa da nysandarǵa qoldanylatyn bolady.
Jiyn barysynda Eraly Toǵjanov elimizdegi epidemiologiialyq ahýal halyq vaktsinatsiiamen jáne revaktsinatsiiamen qamtýǵa tikelei bailanysty ekendigin atap ótken. Osyǵan orai vitse-premer keibir óńirlerdegi revaktsinatsiia kórsetkishiniń tómendigin eskere otyryp, bul baǵyttaǵy jumysty jandandyrýdy tapsyrǵan.
