Foto: primeminister.kz
Taldyqorǵanda QR Premer-Ministri Álihan Smaiylovtyń tóraǵalyǵymen ótken keńeste Jetisý oblysynyń odan ári áleýmettik-ekonomikalyq damý máseleleri qaraldy, - dep habarlaidy "Ult aqparat" primeminister.kz-ke silteme jasap.
Premer-Ministr óz sózinde Memleket basshysynyń Sailaýaldy baǵdarlamasyn oryndaý aiasynda aldaǵy jyldary respýblikanyń aýyldyq aimaqtary men agroónerkásip sektoryn damytý máselelerine basymdyq beriletinin atap ótti. Iaǵni, aýyl turǵyndarynyń tabysy men ómir súrý sapasyn arttyrý jóninde sharalar qabyldanady.
Úkimet basshysynyń aitýynsha, oblys ákimdigi Ekologiia ministrligimen birlesip, irrigatsiialyq jelilerdi sapaly jańǵyrtyp, sý obektilerin ýaqytyly paidalanýǵa berýi qajet. Sondai-aq paidalanylmaǵan jerlerdi memleket menshigine qaitarý áli de ózekti másele bolyp otyr.
«Jergilikti atqarýshy organdar júrgizip jatqan jumystarǵa qaramastan, oblysta áli 857 myń gektar aýyl sharýashylyǵy jeri paidalanylmaidy. Al halyqtyń jaiylymdyq jerlerge degen qajettiligi 680 myń gektardan asady. Sondyqtan aýyldyq eldi mekenderdiń mańynda jerlerdi sol aýyl turǵyndaryna mal jaiýǵa berý joldaryn pysyqtaý kerek. Bul baǵyttaǵy jumysty kúsheitý qajet», — dedi Álihan Smaiylov.
Injenerlik infraqurylym boiynsha Úkimet basshysy qoldanystaǵy káriz jelileriniń tozý deńgeii 58%-ǵa jetkenin, bul rette ákimdik tarapynan osy baǵyttaǵy jumysty jandandyrý qajettigin atap ótti.
Álihan Smaiylov sheshimin tabýdy qajet etetin birqatar áleýmettik máselege nazar aýdardy. Máselen, oblysta bes myńnan astam bala 69 beiimdelgen mektepte oqidy, taǵy bir mektep apattyq jaǵdaida bolsa, 26 mektep saman kirpishten turǵyzylǵan. Sonymen qatar Úkimet basshysy «Jaily mektep» ulttyq jobasyn iske asyrý oqýshy oryndarynyń tapshylyǵy máselesin sheshýge múmkindik beretinin atap ótti. Atap aitqanda, 2026 jylǵa deiin óńirde jańa 10 mektep ashý josparlanyp otyr. Bul maqsatqa respýblikalyq biýdjetten 55 mlrd teńge qarastyrylǵan.
«Sondai-aq Qarjy ministrliginiń sybailas jemqorlardyń qarajaty esebinen qurylǵan biýdjetten tys qory bar. Osy qarajat esebinen de qosymsha mektepter salynatyn bolady», — dedi Premer-Ministr.
Densaýlyq saqtaý salasyndaǵy ahýal týraly aita kele, Úkimet basshysy oblystaǵy 59 meditsinalyq nysan jalǵa alynǵan jáne beiimdelgen ǵimarattarda ornalasqanyn atap ótti.
«Aýyldyq densaýlyq saqtaýdy jańǵyrtý jónindegi ulttyq joba aiasynda eki jyl ishinde osy meditsinalyq obektiler densaýlyq saqtaý jelisiniń normativine sáikes keltiriletin bolady. Sonymen qatar ákimdik jer ýchaskelerin bólýdi jáne injenerlik kommýnikatsiialardy júrgizýdi jedel qamtamasyz etýi qajet», — dedi Premer-Ministr.
Sonymen qatar Álihan Smaiylov qaladan keletin kadrlardy, ásirese jastardy áleýmettik qoldaý arqyly aýyldyq jerlerdegi meditsina qyzmetkerleriniń tapshylyǵy máselesin sheshýdiń mańyzyn atap ótti. Munda, Úkimet basshysynyń aitýynsha, «Diplommen aýylǵa» baǵdarlamasynyń quraldaryn barynsha paidalaný qajet.
Ári qarai ekonomikalyq blok máseleleri týraly sóz qozǵaǵan Premer-Ministr logistikany damytý oblystaǵy perspektivaly baǵyttardyń biri ekenin atap ótti. Ol pandemiia bastalǵannan beri «Qorǵas» shekara mańy yntymaqtastyǵy halyqaralyq ortalyǵy toqtap turǵanyn, alaida qazirgi ýaqytta qytai tarapymen ony ashý týraly kelisimge qol jetkizilgeni týraly aitty.
«Qorǵas» jaqyn arada óz jumysyn bastaýy tiis. Endi daiyndyq jumystaryn jedeldetip, Ortalyq qyzmetine tartylǵan barlyq qurylymdardyń ózara is-qimylyn qamtamasyz etý kerek», — dedi Úkimet basshysy.
Sonymen qatar Álihan Smaiylov josparlanyp otyrǵan investitsiialyq jobalardy ýaqytyly iske qosýdyń jáne óńirdi qoljetimdi baǵada áleýmettik mańyzy bar azyq-túlik taýarlarymen qamtamasyz etýdiń mańyzyn atap ótti.
Sóz sońynda Premer-Ministr ýákiletti memlekettik organdarǵa birqatar naqty tapsyrma berdi: eldi mekenderde gaz taratý jelilerin, «Taldyqorǵan-Úsharal» magistraldyq gaz qubyryn salý, Taldyqorǵanda «Basqýat» qazandyǵyn qaita jańartý jáne Tekeli qalasynyń turǵyndaryn sapaly aýyz sýmen qamtamasyz etý máselelerin pysyqtaý qajet.
Sonymen qatar Úkimet basshysy 6 aýylda sýmen jabdyqtaý júielerin rekonstrýktsiialaý men salýǵa, 15 apattyq jaǵdaidaǵy kópirdi jóndeýge, Aqsý ortalyq aýdandyq aýrýhanasyn jóndeýge jáne seismikalyq jaǵynan kúsheitýge qarajat bólý máselelerin qarastyrý, sondai-aq Kerbulaq aýdanynyń aýrýhanasyn jóndeýge jáne Taldyqorǵanda 500 qabyldaýǵa arnalǵan emhana salýǵa qarajat qarastyrý qajettigine nazar aýdardy.
Energetika ministrligine Alakól jaǵalaýyndaǵy týristik nysandardy úzdiksiz elektrmen jabdyqtaý úshin jeliler qurylysyn kezeń-kezeńmen qarjylandyrý máselesin qarastyrý, Ulttyq ekonomika ministrligine injenerlik infraqurylym salý jáne Balqash kóliniń jaǵalaýyn abattandyrý jónindegi biýdjettik baǵdarlamalardyń ákimshisin anyqtaý tapsyryldy.
Aita keteiik, jiynda Oblys ákimi Beibit Isabaev, aýyl sharýashylyǵy ministri Erbol Qarashókeev, indýstriia jáne infraqurylymdyq damý ministri Marat Qarabaev, densaýlyq saqtaý birinshi vitse-ministri Timýr Sultanǵaziev, sondai-aq ulttyq ekonomika vitse-ministri Baýyrjan Omarbekov pen energetika vitse-ministri Jandos Nurmaǵanbetov iske asyrylyp jatqan sharalar men aldaǵy kezeńge arnalǵan josparlar týraly baiandama jasady.
