QR Qarýly Kúshteriniń materialdyq-tehnikalyq qamtamasyz etý jáne qarýlandyrý bóliminiń bastyǵy polkovnik Asylbek Satybaldinov ustaldy. Bul málimetti Qorǵanys ministrligi rastady.
«2021 jyldyń 28 mamyrynda quqyq qorǵaý organdary Qazaqstan Qarýly Kúshteriniń materialdyq-tehnikalyq qamtamasyz etý jáne qarýlandyrý bóliminiń bastyǵy polkovnik Asylbek Satybaldinovty ustady. Tergeý múddelerine qatysty qalǵan aqparat jariia etýge jatpaidy», - dep jazylǵan Qorǵanys ministrliginiń baspasóz qyzmeti rastaǵan málimette.
Al keibir BAQ dereginshe, ol "qyzmettik ókilettigin asyra paidalandy, syiaqy berý kezinde biýdjet qarajatyn jymqyrdy jáne áskeri qyzmetshilerden aqshalai járdemaqylardy zańsyz óndirip aldy" dep kúdikke ilingen.
"Syiaqynyń jalpy somasy 10 million teńgeden asady", – delingen Orda.kz portalynyń aqparatynda.
Satybaldinovtiń jumys orny men úiinde tintý jumystary júrgizildi.
Sonymen qatar, qarjy qyzmetiniń bastyǵy podpolkovnik Jarbolov ta qylmys jasady dep kúdikke ilingeni týraly aqparat tarady.
Qorǵanys ministrliginiń ókilderi polkovnik Asylbek Satybaldinovti ózin jaqsy qyrynan kórsetken ofitser retinde atap ótti.
Aita keteiik, 2021 jyldyń qańtarynda qorǵanys ministri Nurlan Ermekbaev qaramaǵyndaǵy qyzmetkerlerge sybailas jemqorlyqtyń birde-bir faktisine jol bermeýdi tapsyrǵan bolatyn.
