QR Qorǵanys ministrligi QR Úkimetiniń zapastaǵy ofitserlerdi áskeri qyzmetke shaqyrý týraly Qaýlysyna resmi túsinik berdi, dep habarlaidy QazAqparat.
«Qazaqstan Respýblikasy Úkimetiniń Qaýlysyna sáikes 2022 jyly áskeri qyzmetke jaramdy jáne odan ótpegen zapastaǵy ofitserler eki jyl merzimge áskeri qyzmetke shaqyrylatyn bolady.
Zapastaǵy ofitserlerdi shaqyrý jyl saiyn júzege asyrylady. «Áskeri qyzmet jáne áskeri qyzmetshilerdiń mártebesi týraly» QR Zańynyń 32-babyna sáikes, áskeri qyzmetke jaramdy 29 jasqa deiingi zapastaǵy ofitserler Úkimet qaýlysy negizinde ýákiletti organdardyń ótinimderi boiynsha beibit ýaqytta ofitserler quramynyń laýazymdarynda áskeri qyzmet ótkerý úshin shaqyrylady.
Biyl zapastaǵy 190 ofitser, onyń ishinde Qarýly kúshterdiń 150 ofitseri jáne Ulttyq qaýipsizdik komiteti Shekara qyzmetiniń 40 ofitseri áskerge shaqyrylatyn bolady», - delingen ministrlik habarlamasynda.
Eske salaiyq, búgin QR Premer-Ministri Álihan Smaiylov zapastaǵy ofitserlerdi áskeri qyzmetke shaqyrý týraly qaýlyǵa qol qoiǵan bolatyn.
Qujat alǵashqy resmi jariialanǵan kúnnen keiin kúntizbelik on kún ótken soń qoldanysqa engiziledi.
