Qorǵanys ministrliginiń baspasóz hatshysy Daniiar Áljanov «Soǵys jaǵdaiy týraly» zańnyń jańashyldyqtaryn túsindirip berdi, dep habarlaidy QazAqparat.
Aita ketsek, buǵan deiin Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine soǵys jaǵdaiy máseleleri boiynsha ózgerister men tolyqtyrýlar engizý týraly» zań jobasynyń birinshi oqylymda maquldanǵany habarlanǵan bolatyn. Osyǵan bailanysty Daniiar Áljanov zańnamaǵa sáikes, kirýge tyiym salynatyn aýmaq túsinigi qalaisha keńeitiletinin aityp berdi.
«Bul jerde halyqtyń, ásirese áskeri nysandarǵa jaqyn turatyn adamdardyń qaýipsizdigin qamtamasyz etdi kózdeitin keshendi sharalar áńgime bolyp otyr. Bizde mynadai usynystar bar:
- oq-dári arsenaldary men bazasyn jerdi paidalanýdyń erekshe jaǵdaidaǵy aýmaǵyna jetkizý;
- «tyiym salynǵan aýdan» túsiniginiń aiasyn keńeitý;
- saqtaýdaǵy oq-dárilerdiń kólemi men túri, tipine qarai tyiym salynǵan aýdandar men aýmaqtardyń kólemin bekitý;
- tyiym salynǵan aýdandar men aýmaqtardyń kólemin IIM, IIDM, AShM jáne ákimdiktermen birge esepteý;
- tyiym salynǵan aýmaq erejeleriniń mártebesin kóterý jáne ony bekitý boiynsha Úkimetke quziret berý;
- tyiym salynǵan aýdandar men aýmaqtardyń shekarasyn saqtaý boiynsha jergilikti atqarýshy organdardyń jaýapkershiligin kúsheitý», - dedi Qorǵanys ministrliginiń baspasóz hatshysy.
Daniiar Áljanovtyń aitýyna qaraǵanda, atalǵan jumys 2019 jyldyń jazynan beri depýtattarmen birge júrgizilip keledi. Sonymen qatar, spiker basqa da saqtaý nysandarynda jumys júrgizilip jatqanyn atap ótti.
«Arystaǵy tótenshe oqiǵadan keiin ministrdiń tapsyrmasy boiynsha komissiia qurylyp, onyń quramyna biliktiligi joǵary áskeri mamandar kirdi. Komissiia búkil el boiynsha áskeri nysandarǵa reviziia júrgizip, taldady. Jyldar boiy jinalyp kelgen kemshilikterdi anyqtady. Bul jumystyń aýqymy óte keń. Osy jumystardy qorytyndylai kele oq-dárilerdi saqtaý nysandaryn jetildirý boiynsha keshendi josparǵa kirisip kettik», - deidi ol.
