Foto: sarbaz.kz
QR Qorǵanys ministriniń orynbasary Sultan Qamaletdinov áskeri tehnika óndiretin otandyq kompaniianyń daýly málimdemesine jaýap berdi jáne nelikten túrkiialyq tehnikany satyp alǵanyn túsindirdi, dep habarlaidy QazAqparat portaly.
«Qoǵamda túrik óndirisiniń brondy mashinalaryn satyp alý talqylanyp jatyr, ol Qazaqstanda óndiriletin tehnikanyń tikelei analogy kórinedi. Nelikten Qorǵanys ministrligi sheteldik jetkizýshige basymdyq berip otyr?», - dep suraq qoidy tilshiler Ortalyq kommýnikatsiialar qyzmetinde ótken baspasóz máslihatynda.
QR Qorǵanys ministriniń orynbasary Sultan Qamaletdinov Qorǵanys ministrligi tapsyrys berýshi ekenin, iaǵni Qarýly Kúshterdiń belgili bir qurylymdyq bólimsheleri úshin talap etiletin tehnikalyq sharttardy jariialaitynyn aitty.
«Kazakhstan Paramount Engineering kompaniiasy jóninde ótinishter boldy. Bizdiń bilýimizshe, qyzmettik tekserý júrip qana qoimai, olar bizdi sotqa berdi jáne sotta Qorǵanys ministrligi jeńip shyqty.
Nelikten túrik kompaniiasy tańdaldy? Biz kez kelgen áskeri tehnikanyń arnaiy tapsyrmalardy oryndaýǵa arnalǵanyn anyq bilýimiz kerek. Arnaiy operatsiialar kúshteriniń bólimsheleri úshin mundaǵy «ARLAN» BDM brondalǵan mashinasy jaramsyz, biraq biz olardan bas tartpaimyz, talaptarǵa sáikes keletin jekelegen bólimsheler úshin satyp alamyz. Túrik kompaniiasy shyǵarǵan brondy dońǵalaqty mashinalar týraly tiisti nusqaýlyqtar bar. Olar birneshe elde qyzmetke qabyldandy jáne qarýly qaqtyǵystar kezinde ózderin kórsetti», - dedi Sultan Qamaletdinov.
Óz kezeginde Áskeri-tehnikalyq saiasat departamentiniń ókili polkovnik Begeltaev ministrliktiń 2015 jyldan bastap Kazakhstan Paramount Engineering kompaniiasynan tehnika satyp alatynyn aitty.
«Búgingi tańda Qarýly kúshterde «ARLAN» BDM-niń 138 birligi bar. Jyl sońyna deiin 10 tehnika jetkizýdi josparlap otyrmyz. Tańdaý týraly sheshimdi talaptarǵa sáikes alqa qabyldaidy. Jumys nátijeleri boiynsha ministrlik tehnikanyń belgili bir túrlerine jáne memlekettik qorǵanys tapsyrysyna qarai ótinim jasaidy. Bul rette, Qorǵanys ministrligi oryndaýshyny tańdaýmen jáne sharttar jasasýmen ainalyspaidy. Bul Indýstriia jáne infraqurylymdyq damý ministrliginiń ýákiletti organynyń quzyretine kiredi. Osy jaǵdaidy túsindirý boiynsha zaýyttyń ótinishi Premer-Ministrdiń keńsesi arqyly kelip tústi. Belgilengen tártippen ministrlik tolyq jaýap beredi», - dedi spiker.
