Qorǵanys ministrligi ókilderi mańǵystaýlyq sarbazdyń ólimine qatysty pikir bildirdi, - dep habarlaidy "Ult aqparat".
"Ókinishke qarai, 22 sáýirde Gvardeisk qalashyǵynda ornalasqan áskeri gospitalde ásker qataryna jańadan shaqyrylǵan qatardaǵy jaýynger Álibek Qalbai qaitys boldy. Jeke quramnyń sapqa turýy kezinde ózin nashar sezinip, esinen tanyp qalǵan. Meditsina qyzmetkerleriniń jasaǵan amaldaryna qaramastan, jas sarbazdyń ómirine arasha túsý múmkin bolmady. Eń bastysy, biz uldaryn kelmeske joǵaltqan týǵan-týysqandary men jaqyndarynyń, sonyń ishinde, ata-anasyn túsinemiz jáne qaiǵyra kóńil aitamyz. Sonymen qatar, qatardaǵy jaýynger Qalbaev qaza bolýyna sebepker bolǵan mán-jaǵdailardy qoǵam bilýi qajet", - dedi Qarýly Kúshter bas shtaby bastyǵynyń orynbasary - Tárbie jáne ideologiialyq jumystar departamentiniń bastyǵy general-maior Serik Borambaev.
Onyń sózinshe, arnaiy qurylǵan jedel tergeý tobymen qylmystyq istiń aýmaǵynda oryn alǵan barlyq boljamdy jaǵdai tolyǵymen qarastyrylady. Qajet saraptama alyndy.
"Oqiǵa ornyn qaraý barysynda quqyq qorǵaý organdarynyń resmi qorytyndylary boiynsha, sondai-aq máiitke sot-meditsinalyq saraptama júrgizilip jatyr. Qaza bolǵanǵa deiin jaraqattar men denesinde kógerý belgileri anyqtalmaǵanyn aita ketken jón. Qazirgi ýaqytta da teri qabattarynyń ózgerisi sot-meditsinalyq saraptamany júrgizýmen jáne qaza bolýdyń biologiialyq protsesimen bailanysty.
Senińizder, tergeýdiń obektiv júrgizilýine, biz de múddelimiz. Sebebi barlyq satydaǵy komandirler óziniń qolastyndaǵy áskeri qyzmetshilerdiń ómiri men densaýlyǵyna ata-analar men memleket aldynda tek zań júzinde ǵana emes, sonymen qatar moraldi turǵyda jaýapty", - deidi Borambaev.
Borambaev Qorǵanys ministrliginiń basshylyǵy eshteńeni jasyryp qalmaitynyn atap ótti. Sarbazdyń ata-anasy men jaqyndary oqiǵadan keiin dereý áskeri bólimge baryp, uldary qyzmet atqarǵan bólimshedegi turmystyq jaǵdaimen tanysyp, jaǵdaidy óz kózderimen kórip qaitqan.
"Kelesi jaǵdailarǵa nazar aýdarǵym keledi. Birinshiden, Álibek Qalbai qurlyq áskerleriniń oqý ortalyǵy bolyp esepteletin áskeri bólimge qyzmet atqarýǵa kelgen. Ol jerdegi sarbazdar áskeri mamandyqty igerip, áskeri sheberlik boiynsha bilim alyp, alty ai ótkennen keiin Qarýly Kúshterdiń basqa qurylymdaryna bólinip ketedi. Oqý ortalyǵyndaǵy qyzmet bir shaqyrylymdaǵy sarbaz ustanymy boiynsha qurylǵan. Iaǵni biz shaqyrǵan sarbazdardy oqytyp, áskerge jibermei, basqa sarbazdardy áskerge shaqyrmaidy. Ekinshiden, Qorǵanys ministri qaza bolǵan sarbazdyń máiitin ata-anasynyń turǵylyqty jeri - Mańǵystaý oblysyna komandirler jetkizsin degen sheshim qabyldady. Olar: oqý ortalyǵynyń bastyǵy, áskeri mekteptiń bastyǵy, rota jáne vzvod komandirleri. Úshinshiden, áskeri qyzmetshiniń qaza bolýy isin tergeýdi Ishki ister ministrliginiń áskeri tergeý organdary júrgizip jatyr. Olar óz qyzmetteri boiynsha táýelsiz jáne Qorǵanys ministrligine esep bermeidi. Bul «tekseristiń ádil jáne neǵurlym obektivti» júrgizlýi úshin jasalǵan. Tórtinshiden, bul jaǵdaidy tekserip, eger anyqtalsa kinálilerdi taýyp jáne olardy jaýapkershilikke tartý biz úshin abyroi bolar edi. Eger qandai da bir zańǵa qaishy áreketter rastalatyn bolsa, onda kináli adamdar ǵana emes, sonymen qatar osy jaǵdaiǵa jol bergen komandirler de jaýapkershilikke tartylatynyn atap ótkim keledi", - dedi Serik Borambaev.
Ministrlik ókili tekseristiń barysy týraly tolyq aqparat berip otyratynyn jetkizdi.
